असुरक्षित गर्भपतन गराउने महिला ५८ प्रतिशत

मेचीनगर, ११ चैत । महिला जनचेतना केन्द्र मेचीनगरले सरोकारवालाहरुसँग गर्भपतनको अधिकार विषयक अभिमुखीकरण कार्यक्रम सम्पन्न गरेको छ ।

शुक्रबार मेचीनगर नगरपालिकाको सभाहलमा आयोजित कार्यक्रममा समाजमा अझै पनि सुरक्षित गर्भपतन सम्बन्धी सेवाका बारेमा जानकारी नहुँदा ग्रामीण क्षेत्रका महिलाहरुले भोग्दै आएका समस्या र चुनौतिका बारेमा यो अभिमुखीकरण कार्यक्रम प्रभावकारी हुने बताइएको थियो ।

संस्थाकी संस्थापक अध्यक्ष राधा प्रधान कार्कीले कार्यक्रममा स्थानीय तहका हरेक वडाहरुमा सुरक्षित गर्भपतन सेवा दिन नसके पनि जनप्रतिनिधिहरुले सचेतनामूलक कार्यक्रमहरु प्रभावकारी रुपमा सञ्चालन गर्न आग्रह गरिन् ।

उनले मेचीनगर नगरपालिका, कचनकवल गाउँपालिका र बाह्रदशी गाउँपालिकामा केन्द्रले गरेको अध्ययन अनुसन्धानले अधिकांश महिलाहरुले सुरक्षित गर्भपतनका बारेमा जानकारी नहुँदा घरेलु हिंसाको शिकार बनेका तथ्याङ्कहरु फेला परेको बताइन् ।

कार्यक्रममा नेपाल परिवार नियोजन संघकी स्टाफ नर्स प्रकृति बाँस्तोलाले सुरक्षित गर्भपतनको कानुनी अवस्था, समस्या र चुनौतिका बारेमा जानकारी गराइन् । उनले अझै पनि समाजमा असुरक्षित गर्भपतन गराउने महिलाको संख्या ५८ प्रतिशत रहेको दावी गरिन् ।

उनले प्रादेशिक तथा स्थानीयस्तरमा यस सेवाको बारेमा जानकारीमा कमी हुनु, तालिम नलिएका र सूचीकृत नभएका स्वास्थ्यकर्मीबाट अबैधानिक रुपमा सेवा दिइरहनु र गर्भपतनप्रतिको हेयभावपूर्ण व्यवहार तथा सामाजिक लाञ्छना लगाउने प्रवृत्तिले अझै समाजमा चुतौति दिइरहेको बताइन् ।

मेचीनगर नगरपालिकाकी स्वाथ्य अधिकृत सविता सापकोटाले नेपाल सरकारले तोकिएका स्थानबाट गर्भपतन सेवा लिनेका लागि निःशुल्क औषधिको समेत व्यवस्था गरिरहेको जानकारी दिइन् ।

कार्यक्रमकी प्रमुख अतिथि कोशी प्रदेशकी सांसद सविना बजगाई, विशेष अतिथि मेचीनगर नगरपालिकाकी उपप्रमुख मीना पोखरेल उप्रेती लगायतले शुभकामना मन्तव्य व्यक्त गरेका थिए । उनीहरुले ग्रामीण क्षेत्रमा सचेतनामूलक कार्यक्रम प्रवाह गर्न आफूहरु लागि पर्ने बताएका थिए ।

संस्थाकी अध्यक्ष सीता गुरुङको अध्यक्षतामा भएको कार्यक्रममा नगरप्रमुख गोपाल चन्द्र बुढाथोकी, वडा नम्बर ४ का वडाध्यक्ष अर्जुनकुमार कार्की, वडा नम्बर ६ का वडाध्यक्ष ललितबहादुर तामाङ, वडा नम्बर ७ का वडाध्यक्ष प्रल्हादमणि ओली, विभिन्न संघ–संस्थाका प्रमुख तथा प्रतिनिधिहरुको समेत उपस्थिति रहेको थियो ।

कार्यक्रमको स्वागत लक्ष्मी खनियाँले र सञ्चालन रेजिना श्रेष्ठले गरेकी थिइन् ।