मेचीनगर, २७ बैशाख । दलितमाथि हुँदै आएको सबैखाले विभेद्को अन्त्यका लागि जनचेतना जगाउन महाकालीबाट तीन पत्रकार महिलाले सुरु गरेको साइकल यात्रा मंगलबार काँकरभिट्टाको मेची पुलमा समापन भएको छ ।
बैशाख ६ गते पश्चिम नेपालको कञ्चनपुरस्थित गड्डाचौकीबाट रीता विश्वकर्मा बुढाथोकी, संगीता नेपाली र इन्दिरा विश्वकर्माले साइकलयात्रा सुरु गर्नुभएको थियो । मेचीनगरस्थित पूर्वी सीमा काँकरभिट्टामा उनीहरुले यात्रा पूरा गरेका हुन् ।
रुपन्देही निवासी रीता विश्वकर्मा बुढाथोकी रेडियो नेपालमा आवद्ध पत्रकार छन् । अर्घाखाँचीकी संगीता नेपाली र नवलपरासीकी इन्दिरा विश्वकर्मा पनि सञ्चारकर्मी हुन् ।
‘सबैखाले विभेदको अन्त्य हाम्रो अभिभारा, न्याय, समानता र आत्म सम्मानका लागि महाकाली–मेची साइकल यात्रा २०८०’ भन्ने नाराका साथ उनीहरुले साइकल यात्रा गरेका हुन् ।
साइकलमा उनीहरुले राष्ट्रिय झण्डा फहराउनु भएको थियो भने विभिन्न जिल्लामा जातीय छुवाछुत लगायतका विभेद्विरुद्ध जनचेतनामूलक कार्यक्रम गरेका थिए ।
साइकल यात्री रीता बुढाथोकीले मुलुकमा ठूला राजनीतिक परिवर्तन र राज्य व्यवस्थामा फेरबदल आए तापनि दलित समुदायले राजनीतिक, आर्थिक र सामाजिक क्षेत्रमा समानता र आत्मसम्मानको पूर्ण अनुभूति गर्न नपाएको गुनासो गरिन् ।
साइकल यात्राले समानता र आत्मसम्मानका लागि सकारात्मक सन्देश प्रवाहित गरेको उनको भनाई छ ।
Discussion about this post