बिर्तामोडमा ‘हेल्थ टुरिजम प्रोमोशन प्रोग्राम’

झापा, १६ असार । पूर्वी नेपाललाई मुख्यत भारतको सीमावर्ती बजारमा स्वास्थ्य पर्यटनको गन्तव्यको रुपमा प्रचारप्रसार गर्ने उद्देश्यले दुवै देशका पर्यटन व्यवसायीसँग सरोकारवाला निकायले छलफल गरेको छ ।

आज बिर्तामोड स्थित आदर्श ब्याङ्क्वेटमा पर्यटन बार्डको आयोजना, बिर्तामोड नगरपालिकाको सहकार्य, होटल व्यवसायी संघ झापा, नेपाल एशोसिएसन अफ ट्राभल्स एण्ड टुर एजेन्टस (नाट्टा) र कोशी प्रदेशको सहआयोजनामा ‘हेल्थ टुरिजम प्रोमोशन’ कार्यक्रम भएको हो ।

सो कार्यक्रमको उद्घाटन बिर्तामोड नगरपालिकाकी मेयर पवित्रा महतरा प्रसाईले गरेकी हुन् । कार्यक्रमले स्वास्थ्य सेवा प्रदायक, विरामी र पर्यटन उद्योग लगायत विभिन्न सरोकारवालालाई फाइदा पुग्ने आयोजकले अपेक्षा गरेको छ ।

कार्यक्रमले भारतीय बिरामीहरुलाई नेपालका अस्पतालमा उपचार गर्न आउने वाताबरण बनाउने उद्देश्य समेत राखेको छ । हेल्थ टुरिजम प्रमोशन कार्यक्रममा झापाका हस्पिटल, कोशी प्रदेशका ट्राभल, होटल, होमस्टे साथै पर्यटन ब्यवसायीहरुले आ–आफ्ना ब्यवसाय प्रवर्धनका सामाग्रीसहित ४० वटा भन्दा बढी स्टलहरु राखेका थिए ।

कार्यक्रममा नेपाल र भारतका पर्यटन व्यवसायी, स्वास्थ्य क्षेत्रका सञ्चालक, डाक्टर, सञ्चारकर्मी लगायतको सहभागिता रहेका थियो ।
यसैबीच उद्घाटन कार्यक्रमपछि प्यानल डिस्कसन पनि गरिएको थियो । स्वास्थ्य पर्यटन र क्रस बोडरका चुनौति र सम्भावना विषयमा अन्तरक्रिया समेत गरिएको थियो ।

स्वास्थ्य पर्यटन कार्यक्रममा नेपाल पर्यटन बोर्डका सञ्चालक सदस्य कृष्ण साह, होटल व्यवसायी संघ कोशी प्रदेशका अध्यक्ष राजन श्रेष्ठ, पूर्वाञ्चल क्यान्सर अस्पतालका मेडिकल डाइरेक्टर डा.विरेन्द्र यादव र दृष्टी आँखा अस्पतालका सदस्य सचिव डा.अजित सहभागी थिए । सो कार्यक्रमको सहजकर्ताका रुपमा पत्रकार लक्ष्मी उप्रेतीले गरेका थिए ।

यसैगरी पर्यटनमा क्रस बोडरका चुनौति र सम्भावना विषयमा भारतका हिमालय हस्पिटालिटी एण्ड डेभलपमेन्ट नेटवर्कका सदस्य ओसम लेप्चा, इष्टर्न हिमालय ट्राभल्स एण्ड टुर अपरेटर अफ एशोसियसनका सदस्य सुब्रतो मजुमदार तथा नेपा टुरिजम बोर्डका प्रबन्धक सुर्य थपलिया र उद्योग बाणिज्य महासंघ कोशी प्रदेश पर्यटन तथा हवाई समिति संयोजक भविस श्रेष्ठ सहभागि थिए । सो कार्यक्रमको सहजकर्ताका रुपमा पर्यटन कार्यालय काँकरभिट्टा कर्मचारी निरोज कट्टेलले गरेका थिए ।

उनीहरुले होटल, स्वास्थ्य क्षेत्र तथा भारत र नेपालको सरकार, पर्यटन व्यवसायी लगायत सबै क्षेत्रको सहकार्य भएमा मात्र ‘हेल्थ टुरिजम प्रोमोशन’ गर्न सकिने निश्कर्ष निकालेका थिए ।

होटल ब्यवसायी संघ झापाकी अध्यक्ष इन्दिरा श्रेष्ठको अध्यक्षतामा भएको उद्घाटन कार्यक्रमको स्वागत तथा औचित्य माथि नाट्टा कोशी प्रदेशका अध्यक्ष उदयकुमार श्रेष्ठले प्रकाश पारेका थिए । कार्यक्रमको सञ्चालन नाट्टा कोशी प्रदेशका महासचिव नबिन खरेलले गरेका थिए ।