भद्रपुर, १९ साउन । आज दिउँसो २ वजेसम्म सुनसान थियो जिल्ला कारागार झापा । दुई वजेपछि कारागारमा एकाएक हल्लीखल्ली भयो । के भयो भनेर कैदीबन्दीमा खैलाबैला मच्चियो ।
एक्कासी कारागार प्रशासनले अरु कैदीबन्दीले नथाहापाउन भनेर एकजना कैदीलाई हतकडी लगाएर बाहिर लाने सुरसार मात्र के भएको थियो ।
कैदीबन्दीले भित्रबाट ढुंगामुडा गर्न थाले । टायर जलाए, आगोको मुस्लो बनाएर प्रशासनतिर फाल्न थाले । खवरदार हाम्रो मान्छेलाई बाहिर लान पाईदैन, कारागार प्रशासन मुर्दावाद भन्दै नारा–जुलुस लगाए ।
कारागारभित्रबाट धुँवाको मुस्लो उडिरहेको थियो । भद्रपुर, मेचीनगर र बिर्तामोडको दमकल आगो निभाउने प्रयास गरिरहेको थियो ।सशस्त्र प्रहरी र नेपाल प्रहरीको ठूलो संख्या कारागार बाहिर तैनाथ गरिएको थियो । अन्तमा ती कैदीलाई प्रशासनले बाहिर लानबाट पछि हट्न बाध्य भयो ।
शिवसताक्षी नगरपालिकाका मनोज लावती कर्तव्य ज्यान मुद्दामा झापा कारागारमा ७ वर्षदेखि सजाय काटिरहेका व्यक्ति हुन् । उनलाई कारागार प्रशासनले आज सुनसरीको झुम्का कारागार सरुवा गर्ने तयारी गरेको थियो । प्रशासनले कसैलाई थाहा नदिइ लावतीलाई दिउँसो २ वजेपछि झुम्का कारागार लाने तयारी थियो ।
जव २ वजेपछि उनलाई एक्लै पारेर हतकडी लगाएर लादै गर्दा कारागारभित्र रहेका अन्य कैदीबन्दीले थाहा पाएपछि ढुंगामुडा र आगजनी सुरु गरेका थिए । त्यपछि प्रहरी र कैदीबन्दीको झडव सुरु भयो । करिव ३ घण्टापछि झडप साम्य भएको थियो ।
कारागार प्रशासन प्रमुख मोहनलाल पनेरुले विभागबाट कैदीबन्दी लावतीलाई झुम्का सरुवा गर्न पत्र आएकाले सोहि अनुसार आज दिउँसो २ वजे हतकडी लगाएर लादै गर्दा यस्तो घटना भएको बताए ।
‘हतकडी लगाएर लान मात्र के आटेका थियौँ करिव २ घण्टा असिना आएजस्तो भित्रबाट प्रशासन परिसरमा निरन्तर ढुंगामुडा बर्सिन थाल्यो’, पनेरुले भने–‘टायर जलाए । आगोको मुस्लो बनाएर भित्रबाट बाहिर फ्याके । कर्मचारीहरु कोठा थुनेर बसे । कारागार भित्र रहेको गाडीको सिसा फुटाए । बाहिर रहेका मोटरसाइकलहरु जेगाउन निक्कै हम्मे हम्मे परेको थियो ।’ उनले कैदीबन्दीको हुलदंगाका क्रममा कुनै मानवीय क्षति भने नभएको बताए ।
झापाका प्रमुख जिल्ला अधिकारी शिवराम पोखरेल, जिल्ला प्रहरी प्रमुख एसपी दुर्गाराज रेग्मी, कारागार प्रशासन प्रमुख पनेरु, केदीबन्दीका नायके लगायतको छलफलपछि लावतीको सरुवा तत्कालका लागि रोकिएको र पुर्नविचार गर्ने सहमतीपछि विवाद साम्य भएको थियो ।
Discussion about this post