मलेसिया गएको छोरा वेपत्ता भएपछि आमाको रोदन

मेचीनगर, ७ भदौ । काँकरभिट्टाकी सानी ढकाल घिमिरेले मलेसिया गएको छोरा ६ वर्षदेखि सम्पर्कविहिन भएको भन्दै खोजी गरिदिन मिडिया गुहारेकी छिन् ।

उनले बुधवार साँझ ईटाभट्टा स्थित प्रेस क्लब मेचीनगरको कार्यालयमा पत्रकारहरुसँगको भेटमा मलेसिया गएको ३७ वर्षका छोरा गोपाल घिमिरे ६ वर्षदेखि सम्पर्कविहिन भएपछि खोजी गरिदिन आग्रह गरेकी हुन् ।

मेचीनगर–६ स्थित काँकरभिट्टाका बुबा रामु घिमिरे र आमा सानी ढकाल घिमिरेका जेठो छोरा गोपाल १६ वर्षअघि राज ओभरसिज मेनपावरबाट मलेसिया गएका थिए ।

६ वर्षदेखि छोरा सम्पर्कविहिन भएको भन्दै उनकी आमा रुदै रुदै पत्रकारहरुलाई विश्वभरी प्रचारप्रसार गरिदिन अनुरोध गरेकी छन् ।

‘तपाईहरुको प्रचारले कतै मेरो छोरा भेटिहाल्छ कि भन्ने विश्वास छ’, उनले भनिन्–‘६ वर्षअघि सम्पर्क गरेको थियो । त्यहाँबाट सम्पर्क गर्न छाड्यो । काहिँ मेरो छोरा अपठेरोमा त परेको छैन । धामी लगाए, चिन्हा हेराए । सबैको ढोका ढकढकाए । सम्बन्धीत ठाउँहरुमा गए । अहिलेसम्म काहिँ केहि खवर आएको छैन ।’

०६१ सालमा वैधानिक रुपमा काँकरभिट्टामा शाखा रहेको राज ओभरसिज मेनपावरले छोरालाई मलेसिया उडाएको उनको भनाई छ । मलेसिया गएको एक महिनापछि छोराले इलिगल भएको छु भनेर ईमोमा कुरा गरेको बताइन् । अहिले त्यो मेनपावर काँकरभिट्टामा छैन ।

‘छोरा गोपालले श्रीमती गीतालाई सम्पर्क गर्थो’, सानीले भनिन्–‘त्यसपछि ६ वर्षअघि मसँग पनि ईमोमा कुरा भएको थियो । आमा सुन किनेको छु चाँडै घर आउँछु भन्थ्यो । त्यसपछि सम्पर्क हुन छाड्यो ।’

उनको १९ वर्षको छोरा (नाती) मसँग छ । उनकी श्रीमती (वुहारी) पोइला गएकी थिइन् । ६ महिनाअघि वुहारीको निधन भएकोले उनको काजक्रिया मैले नै गरेको सानीको भनाई छ ।

उनले छोरा अपठेरोमा परेको महसुस गरेकी छन् । जहाँ भएपनि सम्पर्कमा आउँन अनुरोध गरेकी छन् । तिम्रो लागि घर र आफ्नो मिग्रौला बेचेर भएपनि बचाउँन तयार रहेकोले जहाँ भएपनि छोराको खोजीका लागि प्रचारप्रसार गरिदिन पत्रकारहरुलाई रुदै रुदै विलौना पोखिन् ।

पत्रकार सम्मेलनको अध्यक्षता प्रेस क्लब मेचीनगरका अध्यक्ष डम्बर बरालले र सहजिकरण अर्जुन कार्कीले गरेका थिए ।

भिडियो पनि हेर्नु होला ।