कोशीमा मध्यावधि निर्वाचन गर्नुहुन्न : सहमहामन्त्री परियार

मेचीनगर, २३ भदौ । नेपाली कांग्रेसका सहमहामन्त्री जीवन परियारले कांग्रेस नेतृत्वको कोशी प्रदेश सरकार ढलेकोमा चिन्ता व्यक्त गरेका छन् ।

आज काँकरभिट्टा स्थित मेची सामुदायिक हलमा आयोजना गरिएको कांग्रेस झापा क्षेत्र नं. १ प्रदेश (क) को प्रथम सम्मेलनमा प्रमुख अतिथिका रुपमा बोल्दै उनले कोशीमा मुख्यमन्त्री उद्वव थापा नेतृत्वको सरकार ढल्नु सबैका लागि समस्या भएको बताए ।

सर्वाेच्च अदालतले शुक्रबार संविधान विपरित विश्वासको मत लिएको भन्दै थापालाई हटाएर एमालेका हिक्मतकुमार कार्कीलाई मुख्यमन्त्री बनाएको थियो । कार्कीले पनि एक महिनापछि विश्वासको मत लिनु पर्नेछ ।

‘एक महिनापछि के हुने हो थाहा छैन’, सहमहामन्त्री परियारले भने– ‘जे सुकै भएपनि कोशीमा सकेसम्म मध्यावधि निर्वाचनतिर जाने वातावरण बनाउनु हुन्न । त्यसका लागि दलहरुसँग छलफल आवश्यक छ । कांग्रेस त्यो छलफल गर्न तयार छ ।

भ्रष्टाचारको कुरा उठाउँदै उनले भने–‘भ्रष्टाचारको कुनै जात, पद हुँदैन । ललिता निवास, नक्कली भुटानी शरणार्थी, सुन तस्करी, ओम्नी, गिरीबन्धु लगायतका काण्डको छानवीन हुनु पर्छ । कानुन सबैलाई लाग्नु पर्छ ।’

उनले पार्टीका कुनै पनि कार्यकर्ता कांग्रेसदेखि खुशी नभएको बताए । जिल्ला, क्षेत्र, नगर, वडा, टोलका कुनैपनि कार्यकर्तामा कमजोरी छैन, दोषी केन्द्र नै रहेको उनको भनाई छ ।

उनका अनुसार विचारहरू फरक हुन सक्छ तर, सबैको विचारहरुमाथि छलफल गरेर निष्कर्ष निकाल्नु पर्छ ।

आइतबार महामानव विपी कोइरालाको ११० औँ जन्म जयन्ती । विपीका थुप्रै सपनाहरु थिए तर, समय नभएकोले ती सपनाहरु पुरा गर्न नसकेको उनको दावी छ । पार्टीले केन्द्रमा तीनदिन ‘विपी साहित्य महोत्सव’ भव्यरुपमा मनाउँदै छ ।

विपीले प्रतिपादन र परिकल्पना गरेका उद्देश्यहरु पर्टीले कार्ययोजना बनाएर जनतामा लानु पर्ने सहमहामन्त्री परियारको भनाई छ ।

फेसबुके विश्वविद्यालय छ : विमल आचार्य

कार्यक्रममा पार्टीका प्रदेश कमिटी सदस्य एवम् मेचीनगरका पूर्व मेयर विमल आचार्यले पार्टीमा समन्वयको अभाव रहेको बताए । उनका अनुसार आफ्नै गुटमा मात्र छलफल हुन्छ । यहाँ वटस्सप, फेसबुक, मेसेन्जरका विश्वविद्यालय पढ्ने विद्यार्थीहरु छन् । त्यहा अराजकहरूको झुण्डले लेख्ने गर्छन् । जसले गर्दा पार्टीलाई कमजोर बनाइरहेको आचार्यको दावी छ ।

पार्टी विग्रिएको छैन कार्यकर्तामा विचलन : रन्जिता कार्की

कोशी प्रदेश सदस्य रन्जिता कार्कीले पार्टी विग्रिएको छैन कार्यकर्तामा विचलन मात्र आएको बताइन् । उनलेउदाहरण दिँदै भनिन्–‘कुदाउँदै गरेको गाडीले ट्रेक छोड्यो भने सडक छेउमा गएर दुर्घटना हुन्छ नी कांग्रेस अहिले त्यस्तै भएको छ ।’

‘एमालेले १०० रुपैयाँ वृद्व भत्ता दिएर सुरु गर्यो’, कार्कीले भनिन्–‘त्यसपछि बढाईदियो कांग्रेसले । उनीहरुले त्यहि कुरा बोकेर सधै चुनाव जितिरहन्छ । कांग्रेस गरिवको पार्टी हो भनेर चिनाउन सुकुम्बासीलाई निःशुल्क धनिपुर्जा वितरण गर्नुपर्छ ।’

माओवादीलाई जंगलदेखि यहाँसम्म कांग्रेसले ल्यायो : केशव पाण्डे

पार्टीका झापा उपसभापति केशवराज पाण्डेले माओवादीलाई जंगलदेखि यहाँसम्म कांग्रेसले ल्याएको बताए । उनका अनुसार माओवादीलाई बन्दुक बोकेर घरघरमा गएर भोट माग्ने होइन, हात जोडेर भोट आउछ भनेर सिकाएको कांग्रेसले हो ।

नयाँ जन्मेका पार्टीहरुप्रति इङगीत गर्दै पाण्डेले भने–‘वेस नभएको पार्टी हो । फाउन्डेसन नभएको घर कस्तो हुन्छ । त्यस्तै मात्र हो ।’

उनले चाइना, वर्मा, भुटान, बंगलादेश नजिक रहेको नेपालको पूर्वी नाका काँकरभिट्टाबाट पर्यटक आउन भारतले रोकेको बताए । विभिन्न कारणले व्यापार चौपट भएको भन्दै भारतसँग बाणिज्य र परराष्ट्रिय मन्त्रालयले कुटनीतिक नीति लिन नसकेको उनको बुझाई छ ।

बालकृष्ण खाँडलाई निलम्बन गर्नु पर्छ : राम कट्टेल

झापा पूर्व उपसभापति राम कट्टेलले सर्वप्रथम पार्टी सच्चिनु पर्छ, भ्रष्टचारमा मुछिएका नेता बालकृष्ण खाँड निलम्बन गर्नु पर्ने बताए ।

यसरी पार्टी नचल्ने बताउँदै उनल सुन काण्ड, ललिता निवास काण्ड, नक्कली भुटानी शरणार्थी काण्डमा मुछिएका भाइ, छोरा, छोरी, श्रीमती जो भए पनि कठघरामा हाल्नु पर्ने बताए ।

‘उद्वव थापालाई मुख्यमन्त्रीमा २ पटक अदालतले हटायो’, कट्टेलले भने–‘ कांग्रेसले बनाएको सविधान । सविधानमा के छ भनेर ठुला नेताहरुलाई थाहा हुँदैन । गलत सल्लाहमा हिड्नु हुन्छ कांग्रेस ।’

‘नेताले जनता र कार्यकर्ताको मन जित्नु पर्छ । बीचसडकमा नेतामाथि खुकुरी प्रहार भयो । नेतालाई यसै गर्नुपर्छ भन्ने जनतामा भ्रम हुन थाल्यो । शहिदको सपना पूरा भएको छैन । सभापति परिवर्तन गर्नु पर्छ । अब कांग्रेसलाई नविनतम सोचका साथ अघि बढाउनु पर्छ ।’

शेरबहादुर देउवालाई पार्टीबाट निकाल्नु पर्छ : कार्यकर्ता

यसैबीच हलमा कट्टेल बोलिरहदा एकजना स्थानीय कार्यकर्ता उठेर शेरबहादुर देउवालाई पार्टीबाट निकाल्नु पर्छ भन्दै थिए । प्रमुख अतिथि परियारले हातको इसाराले बस्नु भनेका थिए ।

कांग्रेस सरकारमा छ ? : इन्द्र बुढाथोकी

पार्टीका क्षेत्रीय सभापति इन्द्रबहादुर बुढाथोकी कांग्रेस देशको सबैभन्दा ठुलो दल, सरकार चलाएको तेस्रो दलले, सरकारमा कांग्रेस छ कि छैन कार्यकर्तालाई थाहा नभएको बताए ।

अरु पार्टी भनेको खहरे खोला : सुदय पनेरु

पार्टीका मेचीनगर सभापति सुदय पनेरूले कार्यक्रममा खुलेरै कुरा राखेका थिए । उनले नेताहरु गुट–उपगुटमा नलागि कांग्रेस बनाउन लाग्नु पर्ने बताए ।

उनले महाधिवेशन प्रतिनिधलाई भोट हाल्दा गुटमा नलाग्न अग्रह गरे । महाधिवेशन प्रतिनिधले जिताएर पठाएका नेताहरु फोन नै नउठाउने गरेको गुनासो उनको छ ।

‘कांग्रेस इतिहास बोकेको पार्टी हो’, पनेरुले भने–‘अरु पार्टी भनेको खहरे खोला हो । आउँछन, जान्छन् ।’

कांग्रेस झापा क्षेत्र नं.१ प्रदेश (क) का सभापति हरि बुढाथोकीको सभापतित्वमा सम्पन्न प्रदेश सम्मेलनको स्वागत उपसभापति गंगा कोइरालाले र सञ्चालन सचिव इन्द्र आङदेम्वेले गरेका थिए । सभापति बुढाथोकीले प्रदेश सम्मेलनको प्रतिवेदन प्रस्तुत गरेका थिए ।