झापा, ३ असाेज । शिक्षक महासंघले विद्यालय बन्द घाेषणा गरेर आज काठमाडौंमा प्रदर्शन गरेका छन् ।
संसदमा दर्ता भएको शिक्षा विधेयक फिर्ताकाे माग गर्दै काठमाडौंमा महासंघले पहिलो दिन बुधबार माइतीघरमा प्रदर्शन गरेका हुन् ।
देशभरबाट काठमाण्डौं आएका शिक्षकहरु माइतीघरमा भेला भएर आन्दोलनमा सहभागी भएका छन् ।
विगतमा सहमतीका बुँदाहरु विधेयकमा नभएकाले आन्दोलन गर्न आँफूहरु बाध्य भएको शिक्षक नेताहरुकाे भनाई छ ।
कोण सभामा शिक्षक नेताहरुले स्थानीय सरकारका जनप्रतिनिधि लक्षित गर्दै पहिलो दिनको प्रर्दशन सम्पन्न गरेका छन् ।
संसदमा विधेयक दर्ता हुनु अघि नै आन्दोलनको घोषणा गरेको महासंघले शिक्षा मन्त्रालयसँग नभई सिधै सरकारसँग वार्ता गर्ने बताएका छन् ।
विधेयक संसदमा दर्ता भईसकेकोले शिक्षा मन्त्रालयसँग भन्दा सभामुख वा दलका सचेतकहरुसँग वार्ता गर्न सकिने उनले बताए ।
शिक्षक नेताहरुले आफूहरु स्थानीय सरकार मातहत बस्न नसक्ने बताएका छन् ।
महासंघकी सहअध्यक्ष एवम् आन्दोलन परिचालन समितिकी संयोजक नानुमाया पराजुलीले शिक्षा मन्त्रालयसँग वार्तामा बस्न नसक्ने बताइन् । उनले मन्त्रालयसँग विश्वास नभएको बताइन् ।
शिक्षक संघका अध्यक्ष सोमनाथ गिरीले स्थानीय सरकारहरुकाे हेर्ने नजर ठिक नभएकाले समस्या आउने दावी गरे ।
शिक्षकहरुको आन्दोलन चलिरहँदा काठमाडौँ महानगरपालिकाले विद्यालय बन्द गरेर पठनपाठन अवरुद्ध गरेमा कारवाही गर्ने सूचना सार्वजनिक गरेको छ ।
साे सूचनालाई लक्षित गर्दै शिक्षक नेताहरुले स्थानीय सरकारप्रति खवरदारी गरेका छन् ।
कार्यक्रम सञ्चालन समेत गरेका महासंघका महासचिव लक्ष्मीकिशोर सुवेदीले आफूहरु अरिंगाल भएकोले अरिंगालको गोलालाई नजिस्क्याउन आग्रह गरे ।
एमाले निकट नेपाल राष्ट्रिय शिक्षक संगठनका अध्यक्ष विष्णुप्रसाद भण्डारीले पनि दलका नेताहरुलाई शिक्षकले चुनावका बेला गरेको सहयोग नभुल्न स्मरण गराए ।
´शिक्षककै कारण जनआन्दोलन पुरा भएको हो, जिताउन हामी चाहिने अहिले खोलो तर्यो लौरो विर्सियो गर्न पाईन्छ ?’ प्रश्न गर्दै उनले भने ’खबरदार २०८४ साल मा पनि चुनाव हुन्छ ।
सत्ताधारी दल माओवादी केन्द्र निकट एकीकृत अखिल नेपाल शिक्षक संगठनका अध्यक्ष शंकर अधिकारीले पालिकामा रहेका कर्मचारीले आफूहरुलाई गर्ने अनुगमन अमान्य रहेको बताए ।
दोश्रो दिनको आन्दोलन पनि यही शैलीमा सञ्चालन हुने भन्दै शिक्षक नेताहरुले पटक-पटक भएको सहमती पूर्ण रुपमा ऐनमा लिपिवद्ध नभएसम्म आउँदै गरेको दशैं पनि सडकमै मनाउन तयार रहन शिक्षकहरुलाई उर्दी जारी गरेका छन् ।
Discussion about this post