बिर्तामोड, २० असोज । नेपाली कांग्रेसका नेता कृष्णप्रसाद सिटौलाले जनताको ‘मियो’ कांग्रेस नै भएको बताएका छन् ।
कांग्रेसको मियो जनता भएको उल्लेख गर्दै उनले आज बिर्तामोडमा पार्टीको जिल्ला सम्मेलनमा भने, ‘हामी नै हौँ जनताको मियो । ००७ सालदेखि यहाँसम्म आइपुग्दा कांग्रेसमा निराशा छैन । अहिले जनता कसरी निराश भए । जहाँ गयो त्यहाँका कार्यकर्ता र नेताले जनता निराश छन् मात्र भन्ने सुनेको छु । छक्कै पर्छु ।’
गृहमन्त्री समेत रहिसकेका सिटौलाले संविधानको नीतिगत निर्णय कांग्रेसले गरेको दावी गरे । अहिलेसम्म कांग्रेसको नेतृत्वको पछि लागेर कम्युनिष्टहरु आएको उनको भनाई छ ।
उनले ०७२ सालमा जारी भएको नेपालको संविधानको अधिकार अहिलेसम्म पालना नभएकोमा चिन्ता व्यक्त गरेका थिए । उनका अनुसार संविधान जारी भएको ३ वर्षभित्र नयाँ शिक्षा ऐन लागू गर्नुपथ्र्यो तर, अहिले आएर त्यस्को खोजी गरिदैँछ । यस्ता धेरै ऐनहरु स्रविधान अनुसार कार्यान्वयन नभएको उनको भनाई छ ।
‘परम्परागत विकासले अब देश चल्दैन । नयाँ मोडलको विकासले मात्र देशमा विकास सम्भव छ । जनस्तरबाट जनताको समस्या बुझ्नु पर्छ । करिव ३० प्रतिशत जनता गरिवीको रेखामुनी छन् । जनप्रतिनिधिहरुले आफ्नो वडाका गरिब जनता छान्ने, कार्यविधि बनाउने र उनीहरुको स्वास्थ्य बीमा लगायतका विषयमा ध्यान दिनुपर्छ । चिया बगान, बसपार्क, होटल, अस्पतालका मजदुरहरुका समस्या बुझेर उनीहरुको जीवनस्तर उठेमात्र समाजवादतर्फ मुलुकअघि बढ्नेछ’–उनले भने ।
पार्टीको महामन्त्री समेत रहिसकेका नेता सिटौलाले कांग्रेसबाट जितेका जनप्रतिनिधिलाई पार्टीले प्रशिक्षण दिन आवश्यक रहेको बताएका छन् । झापामा १३१ वडा मध्ये ५४ वटा वडा कांग्रेसले जितेको छ ।
कार्यक्रममा पार्टीका महामन्त्री विश्वप्रकाश शर्मा, सहमहामन्त्री भिष्मराज आङदेम्वे, केन्द्रीय सदस्य नैनसिंह महर लगायतका नेताहरुले शुभकामना मन्तव्य राखेका थिए ।
नेपाली कांग्रेसका झापाका सभापति देउमान थेवेको अध्यक्षतामा सम्पन्न जिल्ला सम्मेलनको सञ्चालन सचिव कृष्ण हुमागाईले गरेका थिए ।
Discussion about this post