सरकारको विकल्प खोज्ने भन्दा परिमार्जित गर्नुपर्छ : शर्मा

बिर्तामोड, २० असोज । सत्ता गठबन्धनका एक घटक नेपाली कांग्रेसका महामन्त्री विश्वप्रकाश शर्माले सरकारको विकल्प खोज्ने भन्दा पनि परिमार्जित गरेर लानु पर्ने बताएका छन् ।

आज बिर्तामोडमा नेपाली कांग्रेस झापाको जिल्ला सम्मेलनमा बोल्दै शर्माले सत्ता गठबन्धनको नेतृत्व गरिरहेको पुष्पकमल दाहाल प्रचण्डको सरकारले भ्रष्टचारको फायल खोलेकोमा प्रशंसा गरेका थिए ।

उनले सरकारले संसदमा ल्याएका शिक्षा ऐनको खुलेर विरोध पनि गरेका छन् । सो विधेयकका केहि बुँदाहरु संशोधन गर्नुपर्ने भएकाले हुँबहु पारित गर्न नसकिने कांग्रेस पार्टी कै धारणा रहेको उनको भनाई छ । त्यो विषयमा सरकारले राम्रो काम नगरेको शर्माको गुनासो छ ।

‘समाजको अभिभावक कांग्रेस पार्टी हो’, महामन्त्री शर्माले भने–‘जन्मदाता पनि हो । कांग्रेस भनेको निरन्तर बगिरहने खोला हो । कसैले अहिले आएर व्यण्डबाजा बजाउँदैमा हल्ली हाल्ने पार्टी होइन । नयाँ दलले मिसन ०८४ भनिरहेको अवस्था छ । त्यसले कांग्रेसलाई केहि फरक पार्दैन । कांग्रेसलाई परीक्षाको चिन्ता होइन, अहिले केवल पढ्ने विषयको मात्र चिन्ता छ । चुनाव आउँछ, जान्छ । चुनावमा हारजित हुनु स्वभाविक छ ।’

‘हामीसँग एक्लै सरकार चलाउने मेन्डेट थिएन । ३२ सिटे दलको प्रधानमन्त्री बनाएर सरकार चलाउने भनेर विपक्षी दलले भन्ने गरेका छन् । त्यो त एमालेले पनि ३२ सिटे दलको प्रधानमन्त्री बनाउन खोजेकै हो ।’

उनले अहिलेसम्म बनेका छ लेण्डका सडक, विजुली, पानी, एयरपोर्ट लगायतका सबै विकास निर्माणका काम र ऐन कानुनहरु कांग्रेसको नेतृत्वमा बनेको दावी गरे ।

उनका अनुसार अहिलेसम्म कांग्रेस भन्दा बढी सरकार चलाउने एमाले हो । एमालेले के गर्यो । कांग्रेसले महानायक वीपीको विचारलाई पैरवी गरिरहेको छ । एमालेले मदन भण्डारीको जनताको वहुदलिय जनवादलाई शिरोपर गर्यो ।

उनले कांग्रेसका नेता तथा कार्यकर्ताहरुले पार्टीभित्र अन्तरविरोध, अन्तरघातको रटान छाडेर विहानै तुलसीको मोटमा पानी हाल्दा अब अन्तरविश्वास, अन्तरविश्वासलाई जप्न आग्रह समेत गरे ।