मेचीनगर, ५ कात्तिक । गजलकार एवम् शिक्षक जीवन धितालको सांगितिक गजल ‘तिम्रा केशराशी’ रिलिज भएको छ ।
मेचीनगर–८ स्थित आदर्श माविको स्रोत केन्द्र भवनमा शनिबार आयोजित एक कार्यक्रमकाबीच गजलको म्यूजिक भिडियो विमोचन गरिएको हो ।
कार्यक्रमका प्रमुख अतिथि वरिष्ठ संगितकार जीवन अधिकारीले म्यूजिक भिडियोको विमोचन गरेका थिए ।
कार्यक्रममा प्रमुख अतिथि वरिष्ठ संगितकार अधिकारी, वरिष्ठ साहित्यकार पुण्यप्रसाद खरेल, वरिष्ठ संगित प्रशिक्षक कृष्ण योञ्जन, साहित्य चौतारी झापाका संरक्षक देवीभक्त श्रेष्ठ, नेपाल शिक्षक महासंघ अर्जुनधाराका अध्यक्ष तथा नेपाल राष्ट्रिय शिक्षक संगठन झापाका उपाध्यक्ष पुण्य सुवेदी, शनिश्चरे माविका प्रधानाध्यापक विनोदकुमार गौतम, नेपाल शिक्षक महासंघ झापाका सचिव तथा शिक्षक संघ झापा अध्यक्ष तोया दाहाल (भास्कर), मेची सामुदायिक सेवा केन्द्रका अध्यक्ष मुक्ति पौडेल लगायतले शुभकामना मन्तब्य राखेका थिए ।
शश्चिरे मावि अर्जुनधारा झापामा विज्ञान शिक्षकको रुपमा कार्यरत धिताल साहित्य चौतारी झापाका सदस्य समेत हुन् ।
सोही अवसरमा गजलकार तथा सुर्योदय टेलिभिजनका कार्यक्रम प्रस्तोता दिलीप घिमिरे, क्षितिज साहित्य प्रतिष्ठानका उपाध्यक्ष दुर्गाप्रसाद सिग्देल, आदर्श माविकी शिक्षक प्रतिमा चापागाईं, साहित्य चौतारी झापाका उपाध्यक्ष कृष्ण सुवेदी निराकार, देवीभक्त श्रेष्ठ लगायतले साहित्यक तथा सांगितिक प्रस्तुति दिएका थिए ।
म्यूजिक भिडियोमा मोडल उर्मिला योञ्जनले अभिनय गरेकी छिन् । भिडियोको छायांकन मेचीनगरका पर्यटकीय क्षेत्रमा गरिएको छ । गजल ऐडी म्यूजिक स्टुडियो काँकरभिट्टा तथा प्रज्ञा स्टुडियो काठमाडौंमा संयुक्तरुपमा रेकर्ड गरिएको छ । ध्रुव शर्माले एरेञ्ज गरेको गजलका मिक्स मास्टर शम्भू तन्डुकार रहेका छन् । भिडियो छायांकन तथा सम्पादन तिलक रिजालले गरेका हुन् ।
साहित्य चौतारी झापाको सहआयोजनामा सम्पन्न विमोचन समारोहमा गायक धितालका पुजनीय पिता गणेशप्रसाद धिताललाई सम्मान गरिएको थियो ।
कार्यक्रममा वरिष्ठ समालोचक तथा आख्यानकार राजेन्द्र संग्रौला, आदर्श माविका प्रधानाध्यापक कृष्ण पुरी, संगीत प्रशिक्षकहरु मणि वर्देवा, भरत मैनाली, क्षितिज साहित्य प्रतिष्ठानका अध्यक्ष तुलसीप्रसाद भट्टराई, गायक अर्जुन दाहाल, सामाजिक व्यक्तित्व राम मगरलगायत सञ्चारकर्मीहरुको उपस्थिति रहेको थियो ।
प्रेस क्लब मेचीनगरका उपाध्यक्ष जीआर धितालले सञ्चालन गरेको कायक्रमको स्वागत तथा कार्यक्रम बारेमा गायक जीवन धितालले प्रकाश पारेका थिए । गजलमा शब्द गायक धिताल आफैको रहेको छ भने संगीत जीवन अधिकारीले भरेका हुन् ।
Discussion about this post