मेचीनगर, १६ कात्तिक । समाजसेवी एवम् माओवादीका नेता राजन चिमरियाले यसबर्ष पनि शहिद परिवारलाई गाई र दुर्घटनामा मृत्यु भएका परिवारलाई नगद सहयोग गरेर आफ्नो जन्मोत्सव मनाएका छन् ।
रितिका डेरी धाइजनका सञ्चालक, नेपाल डेरी एसोसिएशनका वरिष्ठ केन्द्रीय उपाध्यक्ष एवम् नेकपा माओवादी केन्द्र मेचीनगरका नगर अध्यक्षसमेत रहेका चिमरियाले शहिद परिवारलाई गाई र मृतकका परिवारलाई नगद सहयोग गरेर आज ५०औँ जन्मोत्सव मनाएका हुन् ।
चिमरियाले जन्मोत्सवका अवसरमा मेचीनगर–१३ का शहिद प्रेम उप्रेतीको परिवारलाई ६५ हजार रुपैयाँ बराबरको उन्नत जातको गाई र शहिद उप्रेतीका पिता गंगा उप्रेती बिरामी रहेकाले औषधिका लागि नगद ५ हजार एक सय रुपैयाँ प्रदान गरेका थिए ।
शहिद उप्रेतीको २०५८ सालमा तेह«थुमको बगाले घटनामा मृत्यु भएको थियो । चिमरियाले शहिद परिवारलाई कृषि उत्पादनमा जोड्ने उद्देश्यले जन्मोत्सवमा गाई प्रदान गरेको बताए । उनले आफ्नो उद्योगबाट उत्पादित सामाग्रीसमेत शहिद प्रेमका पिता गंगा र आमा लक्षिमादेवी उप्रेतीलाई प्रदान गरेका थिए ।
यसैगरी जन्मोत्सवकै अवसरमा चिमरियाले मेचीनगर–१० मा गत कात्तिक १० गते दुर्घटनामा परेर मृत्यु भएका नरेश राजवंशीको परिवारलाई समेत आर्थिक सहयोग गरेका छन् । मृतक नरेशकी छोरी नाइसा राजवंशीको पठन–पाठनमा सहयोग पुर्याउने उद्देश्यले बालिक संरक्षित कोषका लागि ५१ हजारको चेक र काजक्रिया खर्चवापत ५ हजार एकसय रुपैयाँ चिमरियाले सहयोग गरेका हुन् ।
कार्यक्रममा नेकपा माओवादी केन्द्रका केन्द्रीय सल्लाहकार मुकुलचन्द्र राजवंशी (मोहनबा), पार्टीका मेचीनगर सचिव ज्ञानेन्द्र घिमिरे, झापा जिल्ला सदस्य खगेन्द्र सिग्देल, पार्टीका मेचीनगर–१२ का अध्यक्ष पदम सुनुवार, मेचीनगर–१३ का अध्यक्ष पुरुषोत्तम सिग्देल लगायतको उपस्थिति रहेको थियो ।
Discussion about this post