‘घरभित्र हुने हिंसाबाट महिलाहरु मुक्त छैनन्’

झापा, २० कात्तिक । एबिसी नेपाल झापाको संयोजनमा बिर्तामोडमा आयोजित अन्तरक्रियामा एबिसीकी केन्द्रीय अध्यक्ष मिना खत्री कार्कीले घरभित्र हुने हिंसाबाट अझैपनि महिलाहरु मुक्त हुन नसकेको बताएकी छन् ।

एबिसी नेपाल झापाको आयोजनामा बिर्तामोडमा सम्पन्न अन्तरक्रियामा बोल्दै अध्यक्ष कार्कीले घरभित्र हुने हिंसा अझै पनि खुलेर बाहिर आउन नसकेको बताउँदै त्यस्ता समस्यालाई पनि उजागर गर्नुपर्ने बताइन् ।

‘समस्या छ, तर बाहिर आउन÷ल्याउन सक्दैनन् र यो सजिलो पनि छैन’, अध्यक्ष कार्कीले भनिन्–‘ तैपनि त्यस्ता हिंसालाई पनि सहज रुपमा बाहिर ल्याउन सक्ने वातावरण बनाउनु पर्छ ।’

संस्थाले सञ्चालन गर्दै आएका गतिविधि र भावी योजनाबारे जानकारी दिंदै अध्यक्ष कार्कीले संस्थाको दीर्घकालीन व्यवस्थापनका लागि योजना बनाइरहेको जानकारी दिइन् । साथै जिल्ला शाखालाई सीमा क्षेत्र, कारागार लगायतका विभिन्न चारवटा क्षेत्रमा अल्पकालीन काम गर्न सकिने बताउँदै अल्पकालीन कार्यक्रमको प्रस्ताव ल्याउन सुझाइन् ।

सामाजिक सेवामा इतिहास बनाएको संस्थामा जोडिन पाउँदा पनि गर्व गर्नुपर्नेमा जोड दिंदै एबिसीकी महासचिव चन्द्रा विष्टले काम गर्न आवश्यक बजेटबारे स्थानीय सहकारसंग पनि समन्वय गर्न सकिने विकल्प औल्याइन् । संस्थालाई दीर्घकालीन व्यवस्थापनका लागि कोष बनाउने योजना अघि बढेको बताइन् ।

कार्यक्रममा एबिसी नेपाल झापाकी अध्यक्ष कञ्चना ढकाल सिटौलाले काम गर्ने सिलसिलामा संस्थाले जिल्लामा भोग्नु परेको समस्याबारे अवगत गराएकी थिइन् । संस्था स्थापना भएदेखि हालसम्म संस्थाले गरेका गतिविधि समेटिएको प्रतिवेदन सहसचिव उमा शिवाकोटीले प्रस्तुत गरिन् ।

प्रस्तुत प्रतिवेदन अनुसार एबिसी झापाले हिंसा विरुद्ध समाजमा भएका घटनाका बारेमा आवाज उठाउनेदेखि बन्दी गृहका महिलालाई लक्षित गरी सिपमुलक (ब्याग बनाउने) कार्यक्रम सञ्चालन गरेको थियो ।

त्यस्तै सामुदायिक विद्यालयका विद्यार्थी लक्षित लागूऔषध विरुद्ध सचेतनामुलक कार्यक्रम, जोखिमयुक्त समुदायलाई लक्षित गरी कानूनी परामर्श तथा सचेतनामुलक कार्यक्रम, स्टिकर अभियान, जोखिममा परेका बालबालिकालाई उद्दार, सिप प्रदान र बस्ने वातावरण बनाउने लगायतका काम गरेको उल्लेख छ ।

कार्यक्रममा केन्द्रका भावी कार्यक्रम र योजनाबारे सहभागीले जिज्ञासा राखेका थिए । उपाध्यक्ष रेखा अधिकारीले स्वागत गरेको कार्यक्रमको सञ्चालन सचिव देविका निरौला बस्नेतले गरेकी थिइन् ।

कार्यक्रममा एबिसी नेपाल झापाकी कानूनी सल्लाहकार कमला आचार्य उप्रेती, एबिसी नेपाल कोशी प्रदेश कार्यालय लेखा फाँटकी इन्दिरा गौतम, इन्दिरा न्यौपाने, ज्योति रिजाल, शुष्मा पौडेल, उर्मिला खरेल, नम्रता रिजाल, डा.रोमी बुढाथोकी लगायतको सहभागीता रहेको थियो ।

केन्द्रीय टोलीले आजै संस्थाका झापा शाखाको अनुगमन गर्नुका साथै काँकरभिट्टा सीमा नाका र भद्रपुर नाकामा मानव बेचविखन तथा ओसारपसार, निगरानी बारे समेत जानकारी लिनुका साथै अवलोकन गरेको छ ।