३० वर्षपछि अकरिलो अवस्था देख्यो : अध्यक्ष शिवाकोटी

बिर्तामोड, २२ कात्तिक । नेपाल बहुउद्देश्यीय सहकारी संस्था लिमिटेड (एनएमसी) झापाका अध्यक्ष ठाकुर शिवाकोटीले संस्था स्थापनाको ३० वर्षपछि यस्तो अकरिलो अवस्था देख्नु परेको बताएका छन् ।

आज बिर्तामोड सेवा केन्द्रमा संस्थाको वार्षिक प्रतिवेदन सार्वजनिक गरेको पत्रकार सम्मेलनमा अध्यक्ष शिवाकोटीले यस्तो कुरा बताएका हुन् ।

संस्थाका संस्थापक सदस्य समेत रहेका उनले आगामी मंसिर १६ गते हुने संस्थाको ३१ औँ वार्षिक साधारण सभाको पूर्व सन्ध्यामा मुलुकमा भएको आर्थिक संकटले सहकारी क्षेत्रमा परेको असरले संस्था स्थापनाको ३० वर्षपछि पहिलो पटक यस्तो अकरिलो अवस्था देखेको बताए ।

‘केहि खराव सहकारीका कारण अन्य सहकारीहरुलाई पनि अलिक असहज भएको अवस्था छ’, अध्यक्ष ठाकुरले भने–‘देशको आर्थिक अवस्थाले गर्दा पनि अर्थ विदहरुलाई माथापचिको विषय बनेको छ ।

संस्थापक अध्यक्ष रामचन्द्र उप्रेतीले आर्थिक मन्दीले एनएमसीलाई पनि असर गरेको बताए । उनका अनुसार सदस्यहरुले गत वर्षहरुबाट ऋणको साँवाव्याज घटाउँदै लगेका थिए । तर, अहिले फेरि मन्दीको प्रभाव बढ्दै गएको छ ।

‘सुधार हुँदै गएको उठ्न बाँकी व्याज ३ दशमलव ५ प्रतिशत छ’, उप्रेतीले भने यसलाई तल झार्न कोशिश गरिरहेका छौँ तर, मन्दीले संस्थालाई असर गर्यो । बचत तथा ऋणमा मात्र होइन, डेरी उद्योग, एग्रो फार्म, सहकारी पसल र चिया व्यवसायलाई समेत असर पारेको छ ।’

संस्थामा विभिन्न साना–ठुला २१ वटा सहकारीहरु एकीकरण भएको प्रमुख कार्यकारी अधिकृत (सिईओ) लक्ष्मीप्रसाद उप्रेतीले बताए । काँकरभिट्टामा २०५० सालमा स्थापना भएको संस्थाले दुई लाख ५३ हजारबाट कारोबार सुरु गरेको उनले बताए । उनका अनुसार हाल यसको कार्य क्षेत्र झापा, मोरंग र इलाम जिल्लामा छ । यसका १ लाख ५३ हजार ८०३ जना सदस्य र ५८ वटा सेवा केन्द्र छन् ।

अध्यक्ष शिवाकोटीले संस्थाको शेयरपुँजी १ अर्व ४० करोड ५ लाख १८ हजार ६०० रुपैयाँ रहेको बताए । संस्थागत पुँजी ८१ करोड २३ लाख २६ हजार २० रुपैयाँ, निक्षेप मौज्दात ९ अर्व ३८ करोड ३० लाख २९ हजार ६८५, कर्जा लगानी १० अर्व ६३ करोड ३८ लाख २९ हजार ३१८, बाह्य ऋण ४४ करोड ७० लाख २८ हजार ८६७ रुपैयाँ रहेको शिवाकोटीले जानकारी दिए ।

त्यस्तै संस्थाको कुल सम्पत्ति १३ अर्व २ करोड ८ लाख १६ हजार ४२१ र खुद नाफा २३ करोड २५ लाख ८७ हजार ३३९ रुपैयाँ रहेको उनले बताए ।