मेचीनगर, २३ कात्तिक । नेपाली कांग्रेस झापा क्षेत्र नं.१ बाट १० जना नेता महासमिति सदस्यमा निर्वाचित भएका छन् । एकजना महिला निर्विरोध निर्वाचित भएकी छिन् ।
जसमा संविधानसभा सदस्य, निवर्तमान मेयर, जिल्ला उपसभापतिसहित पूर्व जिल्ला उपसभापति लगायत छन् ।
निर्विरोध निर्वाचित हुने महासमिति सदस्यमा डम्बरकुमारी थापा रहेकी छिन् । उनी आदिवासी जनजाती महिला तर्फबाट हुन् ।
खुला पुरुषतर्फ ५ पदमा विमल आचार्य ३६५, केशवराज पाण्डे ३५२, राम कट्टेल ३५२, असोककुमार पोखरेल ३२३ र मणिकुमार उप्रेती २६१ मत प्राप्त गरी निर्वाचित भएका छन् ।
महासमिति सदस्यमा निर्वाचित आचार्य मेचीनगर नगरपालिकाका निवर्तमान मेयर र पार्टीका कोशी प्रदेश सदस्य हुन् ।
पाण्डे पार्टीका झापा उपसभापति र कट्टेल पूर्व झापा उपसभापति, पोखरेल पहिला पनि महासमिति सदस्य थिए भने उप्रेती पूर्व क्षेत्रीय समिति सभापति हुन् ।
खुला पुरुषतर्फका उम्मेदवारहरु पुष्प पौडेलले २४७, लोकराज ढकालले २४१, खड्ग धिमालले २२८ र पंकजबिक्रम नेम्बाङले १९५ मत मात्र प्राप्त गरेको निर्वाचन समिति संयोजक चन्द्रशेखर गुरगाईले बताए ।
खुला महिलातर्फ २ पदमा दुर्गादेवी खतिवडाले ३७६ र उषा गुरुङले २९२ मत ल्याएर निर्वाचित भएका छन् । शोभा श्रेष्ठले २६० मत मात्र प्राप्त गरेकी थिइन् । निर्वाचित गुरुङ संविधान सभा सदस्य हुन् ।
त्यस्तै खस आर्य खुलाको १ पदमा तेजप्रसाद चम्लागाई २७९ मत ल्याएर निर्वाचित भए । उनका प्रतिस्पर्धी रोहित बुढाथोकीले २६९ मत मात्र प्राप्त गरेका थिए । निर्वाचित चम्लागाई नेपाल शिक्षक महासंघका कोशी प्रदेश अध्यक्ष हुन् ।
खस आर्य महिलातर्फ चन्द्रकला भट्टराई २०२ मत ल्याएर निर्वाचित भइन् । उनकी प्रतिस्पर्धी शुशिला रिजालले १७० र टीका सुवेदीले १५० मत प्राप्त गरेको संयोजक गुरगाईले बताए ।
त्यसैगरी आदिवासी जनजाती खुलातर्फको १ पदमा प्रेम सम्बाहाम्फे ३७९ मत ल्याएर निर्वाचित भएका थिए ।
उनका प्रतिस्पर्धी बलाजित राईले १६८ मत मात्र प्राप्त गरेको निर्वाचन समितिले जनाएको छ । निर्वाचित सम्बाहाम्फ झापाका पूर्व सचिव हुन् ।
आज सम्पन्न महासमिति सदस्यको चुनावमा जम्मा ६०७ जनामध्ये ५६१ जना प्रतिनिधिले मतदान गरेका थिए ।
Discussion about this post