बिर्तामोड, २८ मंसिर । आगामी २०८२ साल फागुन महिनाको शुक्लपक्षमा सतीको श्राप बगाउने उद्देश्यले मेचीदेखि महाकालीसम्म १०८ श्रीमद्भागवत महापुराण आयोजना गरिने भएको छ ।
आज बिर्तामोड स्थित धार्मिक अनुष्ठान सेवा समाजको कार्यालयमा पत्रकार सम्मेलनको आयोजना गरेर सो विषयमा जानकारी गराइएको थियो ।
समाजका अध्यक्ष पं.माधवशरण खनालले मेचीेदेखि सुरु भएको पुराण यात्रा अबिराम रुपमा महाकालीसम्मै पुग्ने र जम्मा १०८ वटा स्थानमा महापुराण आयोजना हुने जानकारी दिए ।
समाजले शुक्रबार मेचीनगर नगरपालिका–८, सुन्दर टोल स्थित नवदुर्गा मन्दिरबाट उक्त महापुराणको सुरु गरिने बताएको छ ।
नवदुर्गा मन्दिरमा दिउँसो १२ बजे महापुराणको पं. देवीप्रसाद खतिवडाले कथा बाचन र आचार्य दुर्गाप्रसाद खतिवडाले उद्घाटन गर्ने कार्यक्रम रहेको मन्दिर समितिका अध्यक्ष केशर तिम्सिनाले बताए ।
अध्यक्ष पं. खनालले भीम मल्लको षडयन्त्र पूर्वक मृत्युपछि उनकी पत्नी सतीदेवीले देशको भलो चाहनेको कहिल्यै भलो नहोस् भनेर श्राप दिएको हुँदा मुलुकले उन्नति गर्न नसकेको कारण उक्त श्रापलाई धार्मिक विधिपूर्वक बगाइने लागेको दावी गरे ।
उनका अनुसार एउटा स्थानमा एकहप्ता पुराण गरिने भएको छ । पुराणका लागि व्यास आसनको रुपमा प्रयोग गर्न सकिने गरी रथ निर्माण गरिएको छ । मेचीदेखि महाकालीसम्म नै रथमा पुराणबाचक गरिने छ ।
पं.खनालकै संकल्प अनुसार २०७६ सालदेखि १०८ श्रीमद्भागवत महापुराण सुरु गरिएको थियो । २०८० सालमा संकल्प पूरा गर्न नसकेको बतायउको छ ।
कोरोना महामारीअघि ५ वटा र कोरोनापछि १२ वटा पुराण गरिसकिएको छ भने अब ९१ वटा पुराण ४ वर्षमा सक्ने योजना रहेको खनालको भनाई छ ।
‘एउटा पुराण सम्पन्न गर्न करिव ४ लाख खर्च लाग्छ’, खनालले भने–‘त्यसको चाँजोपाँजो स्थानीय आयोजकले नै गर्नेछन् । पुराणबाट संकलित श्रोत र साधनलाई स्थानीय मठमन्दिरकै संरक्षणमा प्रयोग गरिने भएको छ । स्थानीय आचार्यहरुले निःशुल्क बाचन गरिदिने विश्वास छ ।’
सो अवसरमा पं.घनश्याम ढकालले शान्तिका लागि मुक्ति मोचन गर्ने भएकाले यो अभियान कमाउने उद्देश्य नभएको स्पष्ट पारे । उनले १२ वटा स्थानमा हुने पुराणमा आफैले निःशुल्क पुराण बाचन गरेर अभियानलाई सघाउने घोषणा गरे ।
समाजका अध्यक्ष पं.खनालको अध्यक्षतामा सम्पन्न पत्रकार सम्मेलनको स्वागत सचिव भीमप्रसाद मिश्रले र सञ्चालन समितिकी सल्लाहकार एवम् अधिवक्ता हेमकला कट्टेल खत्रीले गरेकी थिइन् ।
Discussion about this post