मन्त्री गुरुङद्वारा सार्वजनिक जग्गाहरुको स्थलगत अनुगमन

मेचीनगर, १२ माघ । संघीय सहरी विकास मन्त्री सीता गुरुङले काँकरभिट्टा क्षेत्रका सार्वजनिक जग्गाहरु स्थलगत अनुगमन गरेकी छिन् ।

आज साँझ मन्त्री गुरुङले राष्ट्रिय आवास कम्पनीको स्वामित्वमा रहेको काँकरभिट्टा मावि, मिनी मार्केट, बसपार्क, देवकोटा पार्क, क्याम्पस लगायतका क्षेत्रहरुको स्थलगत अनुगमन गरेकी हुन् ।

मन्त्री गुरुङले काँकरभिट्टा आर्थिक विकासको हव बन्दै गइरहेकोले मेचीनगरका राजनीतिक दलहरुबीच एकता, सहकार्य गरेर कोशी प्रदेशकै नमूना बन्नुपर्नेमा जोड दिएकी थिइन् ।

‘राजनीतिले विकास ल्याउनु पर्छ’, मन्त्री गुरुङले भनिन्–‘विकासका लागि राजनीति गर्ने हो, विगार्न होइन । विकासमा राजनीति गर्न हुँदैन ।’

यस क्षेत्रका सार्वजनिक जग्गाको समस्यालाई कानूनी प्रकिया, अध्ययन, अवलोकन गरेर चाँडै समाधान गर्ने बताइन् । हतार गरेर फेरि पछुताउनु भन्दा ढिलै गर्ने तर परिपक्कसँगले काम गर्नु पर्ने उनको भनाई छ ।

नेपाली कांग्रेसका महामन्त्री एवम् झापा–१ का सांसद विश्वप्रकाश शर्माले कर्मचारीहरुलाई ढुक्क भएर काम गर्न आग्रह गरेका छन् । उनले राम्रो कामका लागि यहाँका सबै राजनीतिक दलबाट सहयोग हुने दावी गरे ।

मेचीनगर नगरपालिका मेयर गोपाल चन्द्र बुढाथोकीले काँकरभिट्टा क्षेत्रका सार्वजनिक जग्गाहरु नगरपालिकालाई हस्तान्तरण हुनु पर्ने मागसहितको फायल मन्त्री गुरुङलाई पेश गरेका थिए ।

उनले काँकरभिट्टामा जग्गा अभावका कारण पार्किङको समस्या रहेको बसपार्कमा वहुतले पार्किङ बनाउन जोड गरिएको बताए ।

कार्यक्रममा मन्त्री गुरुङ, सांसद शर्मा, संविधान सभा सदस्य रविन कोइराला, उषा गुरुङ लगायतले आ–आफ्नो धारणा राखेका थिए ।

छलफलमा राष्ट्रिय आवास कम्पनीका केन्द्रीय अध्यक्ष, महानिर्देशक लगायतको टोलीको सहभागिता रहेको थियो ।

राष्ट्रिय आवास कम्पनीको स्वामित्वमा रहेका सार्वजनिक जग्गाहरु स्थानीय सरकारलाई हस्तान्तरण गर्नु पर्छ भन्ने पक्षमा मेचीनगरका सबै राजनीतिक दलका प्रमुखहरु, स्थानीय सरकार, कोशी प्रदेशका सांसद र संघीय सांसद समेतको एकैवद्वता रहेको छ ।

यसैबीच मेचीनगर–७ स्थित नाङाग्युर देकछेन छोलिङ्ग गुम्बाका अध्यक्ष सुभास गुरुङ, सचिव होमराज गुरुङ, जगत गुरुङ लगायतले मन्त्री गुरुङलाई गुम्बाको भवन निर्माणका लागि प्रस्तावाना पेश गरेका छन् ।

मेचीनगरका मेयर गोपाल चन्द्र बुढाथोकीको अध्यक्षतामा सम्पन्न कार्यक्रमको सञ्चालन निमित्त प्रमुख प्रशासकिय होमनाथ भण्डारीले गरेका थिए ।

भिडियो पनि हेर्नुहोला ।