झापा, १६ माघ । संघीय प्रतिनिधि सभाका सभामुख देवराज घिमिरेले झापा कारागारमा क्षमताभन्दा बढी कैदीबन्दीका कारण सिर्जित समस्या समाधानमा पहल गर्ने बताएका छन् ।
आज झापा जिल्ला कारागारमा बन्दी विकास पुस्तकालयको २६औँ वार्षिक साधारण सभालाई सम्बोधन गर्दै उनले यस्ताे कुरा बताएका हुन् ।
उनले परिबन्धमा परेर कठोर जेलजीवन बिताउन बाध्य कैदीबन्दीले पाउनुपर्ने न्यूनतम सुविधामा नजरअन्दाज गर्न नमिल्ने बताए ।
सभामुख घिमिरेले कैदीबन्दीले विगतको गल्तीबाट पाठ सिकेर कैद भुक्तानपछिको बाँकी जीवनलाई समाज रुपान्तरणमा लगाउन आग्रह गरे । कारागारको फोहरमैला व्यवस्थापनका लागि पहल गर्ने उनले बताए ।
कारागारमा क्षमताभन्दा बढी कैदीबन्दी रहेको कारागार प्रमुख मोहनलाल पनेरुले बताउनुभयो ।
कारागार प्रमुख माेहनलाल पनेरूले कारागारमा एक हजार पाँच सय २७ पुरुष, दुईजना नाबालक र ९२ जना महिला गरी एक हजार ६ सय २१ जना रहेकाे बताए ।
उनले विगत एक वर्षअघि थपिएको एउटा भवनसहित गरी सात सयजना कैदीबन्दी अट्ने क्षमता रहेको कारागारमा क्षमताभन्दा बढी कैदीबन्दीका कारण फोहर-मैला व्यवस्थापनमा समस्या बढिरहेको बताए ।
बन्दी विकास पुस्तकालयका सचिव रमेश पोखरलले नेपाल सरकारले उपलब्ध गराउँदै आएको दैनिक ८० रूपैयाँ र सात सय ग्राम चामलले जीवन धान्न कठिनाइ भइरहेको बताए ।
कारागारमा बन्दी जीवन बिताइरहेकाहरुका लागि सीप सिकाउने, खेलहरु खेलाउने, अध्ययन अध्यापनमा रुचि जोगाउने लगायत नमूना कार्यहरु गर्दै आएको उनले बताए ।
कार्यक्रममा संघीय प्रतिनिधि सभाका सदस्य एलपी सावा, प्रदेशसभा सदस्य चिन्तन पाठक, गोपाल तामाङ, पूर्व सदस्य वसन्त बानियाँ, मेचीनगर नगरपालिकाका मेयर गोपाल चन्द्र बुढाथोकी, दमक नगरपालिकाकी उपमेयर रेगिना भट्टराई लगायतलाई सम्मान गरिएको थियो ।
Discussion about this post