हात्ती पीडितको कुरा सुन्न सरकार घरैमा आयो : मुख्यमन्त्री कार्की

बाहुनडाँगी, ९ फागुन । कोशी प्रदेशका मुख्यमन्त्री केदार कार्की लगायतको टोलीले प्रकृति संरक्षण र प्रवद्र्धनका लागि हात्ती प्रभावित क्षेत्रमा बुधवारदेखि सातदिने हात्तीमैत्री पदयात्रा सुरु गरेका छन् ।

‘जीव, जनावर, जल, जंगल र जनतामैत्री जिम्मेवार जनप्रतिनिधि’ भन्ने मुल नाराकासाथ बुधवारदेखि मुख्यमन्त्री कार्कीको टोलीले बाहुनडाँगीबाट उदयपुरको बेलचोकसम्म ७ दिने पदयात्रा सुरु गरेका हुन् ।

‘सरकारलाई यहाँ कसैले बोलाएर आएको होइन’, मुख्यमन्त्री कार्कीले भने–‘यहाँका जनता हात्तीबाट पीडित छन् भन्ने बुझेर सरकार आफै आएको हो । जनताको दुख बुझ्न र सुन्न घरैमा आएका छौँ । हामी बाच्न जीवजन्तु पनि चाहिँन्छ । हात्तीबाट पीडित जनता र बालीनालीको के कति क्षति भयो । यो सबै बुझ्न पनि आएका हौँँ ।’

उनका अनुसार आगामी बजेटमा हात्तीबाट पीडित जनता र बालीको बीमा गर्ने तयारीका लागि पनि यो पदयात्रा हो । यहाँका जनताले दिएको भोटको ऋण तिर्न पनि आएको उनको भनाई छ ।

मुख्यमन्त्री कार्कीलाई बाहुनडाँगीबासीले ११ बुँदे मागहरु समेटिएको ज्ञापनपत्र बुझाएका छन् । मुख्यमन्त्री कार्कीलाई मागपत्र बुझाउँदै नागरिक समाजका अध्यक्ष निलकण्ठ तिवारीले माग पूरा गर्न आग्रह गरे ।

हात्ती नियन्त्रणका लागि सीमा क्षेत्रमा लगाइएको सौर्य विद्युतीय तारबार मर्मत, सम्भार र संरक्षणका लागि नियमित बजेटको व्यवस्था गरिदिनु पर्ने बाहुनडाँगीबासीको माग छ ।

मागपत्रमा मेचीनगर–४ का वडाध्यक्ष अर्जुन कार्की, नागरिक समाजका अध्यक्ष तिवारी, नेपाली कांग्रेसका सभापति सागर कार्की, नेकपा एमालेका अध्यक्ष तीर्थराज कार्की, नेकपा माओबादी केन्द्रका अध्यक्ष खगेन्द्र रामुदामु, रास्वपाका अध्यक्ष हस्तबहादुर खड्का र राप्रपा अध्यक्ष चन्द्रप्रसाद सुबेदीको हस्ताक्षर रहेको छ ।

त्यस्तै, कांग्रेसका जिल्ला प्रतिनिधि निरज घिमिरे, शुभ चिया किसान सहकारीका अध्यक्ष रमेश दाहाल, समाजसेवीहरु गोविन्द न्यौपाने, दिपेन थापा, हरिप्रसाद उप्रेती, आरआरटी संयोजक न्यूटन कार्की लगायतले मागपत्रमा हस्ताक्षर गरेका छन् ।

कार्यक्रममा मुख्यमन्त्री कार्की, कोशी प्रदेश सभा सदस्य सबिना वजगाई, मेचीनगर नगरपालिकाका मेयर गोपालचन्द्र बुढाथोकी, वडा नम्बर ४ का वडाध्यक्ष अर्जुनकुमार कार्की, मानव हात्ती द्वन्द व्यवस्थापन तथा वातावरण समिति अध्यक्ष सागर कार्की लगायतले आ–आफ्नो विचार राखेका थिए ।

कोशी प्रदेशको पर्यटन, वन तथा वातावरण मन्त्री गणेश उप्रेतीको अध्यक्षतामा सम्पन्न उद्घाटन कार्यक्रमको स्वागत मन्त्रालयका सचिव विशाल घिमिरेले गरेका थिए ।

यो भिडियो पनि हेर्नुहोला ।