यातायात क्षेत्रको विकृति अन्त्य गर्न पूर्वबाट अभियान

मेचीनगर, ३० फागुन । यातायात क्षेत्रको विकृति र समस्याहरुलाई अन्त्य गर्न नेपाल यातायात ब्यवसायी राष्ट्रिय महासंघमा आवद्ध चार वटा यातायात व्यवसायीहरुको संगठन मिलेर संयुक्त यातायात ब्यवस्थापनका लागि पूर्वबाट अभियान सुरु गरेका छन् ।

आज काँकरभिट्टा स्थित पूर्वी मेची बस व्यवसायी प्रालिको सभाहलमा आयोजित मेची संयुक्त यातायात ब्यवस्थापन समिति झापाले संयुक्त यातायात ब्यवस्थापनको औपचारिक रुपमा शुभारम्भ गरेको हो ।

कार्यक्रमका प्रमुख अतिथि कोशी प्रदेशका पूर्व सांसद एवम् पूर्वी मेची बस व्यवसायी प्रालिका पूर्व अध्यक्ष श्रीप्रसाद मैनालीले संयुक्त यातायात ब्यवस्थापनको उद्घाटन गरे ।

उनले लामो र छोटो दुरिका यात्रुबहाक बसलाई चैत १ गतेदेखि यातायात क्षेत्रमा देखिएका समस्या, विकृतिलाई रोक्न अनुशासित, मर्यादित र व्यवस्थित ढंगले सञ्चालन गर्ने बताए । समितिमा पूर्वी मेची बस व्यवसायी प्रालि, पूर्वी हिमाल यातायात प्रालि, मेची यातायात एण्ड अटो प्रालि र मेची सुपर यातायात प्रालि रहेका छन् ।

यात्रुवहाक बसहरुबीचमै अस्वस्थ्य प्रतिस्पर्धा, राज्यले सार्वजनिक यातायातका लागि निर्धारण गरेको भाडाको दररेटमा समस्या, विचौलियाको हैरानी, यात्रु तानतान लगायतका कारण यातायात ब्यवसायीहरु चिन्तित बनेको अवस्था रहेको समितिको भनाई छ ।

कार्यक्रममा संयुक्त यातायात ब्यवस्थापन समितिका संयोजक एवम् पूर्वी मेची बस व्यवसायी प्रालिका अध्यक्ष राजेन्द्र रिजालले १५ बुदे कार्यपत्र प्रस्तुत गरेका थिए । समितिले संयुक्त टिकट बुकिङ ब्यवस्थापन प्रयोजनका निमित्त मेचीदेखि काठमाडौँसम्म आवश्यक समन्वय र सहकार्य गर्ने कार्यपत्रमा उल्लेख छ ।

समितिले काँकरभिट्टादेखि मोरङको उर्लावारीसम्म संयुक्त टिकट बुकिङ काउन्टर स्थापना गरिसकेको छ । भोलिदेखि उक्त क्षेत्रमा अनुगमन तथा निरीक्षण गरिने बताइएको छ । विपी राजमार्गमा राति अनाधिकृतमा सञ्चालन गरिरहेका हाइस तथा छोटा यात्रुवहाक गाडीहरुलाई रोक्ने समितिको दावी छ ।

समितिले विचौलिया र अनाधिकृत तरिकाले टिकट बुकिङ गर्नेहरुलाई रोक्न जिल्ला प्रशासन कार्यालय, जिल्ला प्रहरी कार्यालय, इलाका प्रहरी कार्यालय काँकरभिट्टा, बिर्तामोड र दमकलाई समेत ज्ञापन पत्र बुझाएको छ ।

कार्यक्रममा प्रमुख अतिथि मैनाली, मेचीनगर यातायात ब्यवस्थापन समितिका अध्यक्ष डिल्लीराम घिमिरे, होटल ब्यवसायी संघ मेचीनगरका अध्यक्ष सुरेशकुमार श्रेष्ठ (गोपाल), ट्राभल्स संघ झापाका अध्यक्ष निरबहादुर कार्की (नेत्र), काँकभिट्टा ट्राफिक पोष्टका प्रमुख प्रहरी नायव निरीक्षक मनमोहन पौडेल, नेपाल यातायात स्वतन्त्र मजदुर संगठन मेचीनगर इकाइका अध्यक्ष राजकुमार सुवेदी, मेची सामुदायिक सेवा केन्द्रका अध्यक्ष मुक्ति पौडेल लगायतले शुभकामना मन्तव्य राखेका थिए ।

संयुक्त यातायात ब्यवस्थापन समितिका संयोजक राजेन्द्र रिजालको अध्यक्षतामा सम्पन्न कार्यक्रमको स्वागत सदस्य हेमराज दाहाल (भान्जा)ले र सञ्चालन पूर्वी मेची बस ब्यवसायी प्रालिका पूर्व अध्यक्ष विष्णुकुमार श्रेष्ठले गरेका थिए ।