गठबन्धनका नेताहरुले रवि लामिछानेलाई पनि डुवाइसके : राम कार्की

मेचीनगर, ३ चैत । नेकपा माओवादी केन्द्रका सचिव राम कार्की ‘पार्थ’ले अहिलेको गठबन्धन दलहरुप्रति सांकेतिक व्याङ्ग गर्दै जति नै पानीमा पानी मिसाए पनि नौनी घ्यु ननिस्कने बताएका छन् ।

आज काँकरभिट्टा क्याम्पसको सभाहलमा रिडर्स झापाले आयोजना गरेको नेता एवम् विद्वान राम कार्कीद्वारा लिखित ‘विकल्प’ समता, समाजवाद र मुक्त दुनियाँ पुस्तकको अन्तरसम्बाद कार्यक्रमलाई सम्बोधन गर्दै लेखक कार्कीले नेकपा माओवादी केन्द्र, एमाले, एकीकृत समाजवादी, रास्वपा लगायतको गठबन्धन सरकारले कुनै नयाँ कुरा दिन नसक्ने दावी गरेका हुन् ।

‘भष्ट्रचारको कुरा बढ्दै गयो भने सबै पार्टीका नेताहरु झेलखानामा भेटिन्छन्’, कार्कीले भने–‘त्यो नक्षत्र देखिँदैछ । गठबन्धनका नेताहरुले रवि लामिछानेलाई पनि डुवाइसकेका छन् । सत्तामोहमा लाग्ने जोकोही त्यो खाडलबाट बाहिर निस्कन सक्दैन ।’

कम्युनिष्टका नेता पुष्पलाल र मोहनविक्रम

कम्युनिष्टमा लाग्नेहरु मध्ये ५० वर्षपछि पनि भावि सन्ततिले पढ्न सक्ने नेतामा पुष्पलाल श्रेष्ठ र मोहनविक्रम सिंहबाहेक कोही नभएको कार्कीको भनाई छ । उनीहरुले जस्तो दुःख सायद अहिलेसम्म कसैले नगरेको उनको जिकिर छ ।

नेपालमा माक्सवादलाई प्रदुर्षित बनाए

‘पुँजीवादले जँरा गाडिसकेकोले पुँजीवादपछि समाजवाद ल्याउन धेरै मुस्किल छ । जुनसुकै विचारको माक्सवाद आधुनिक छ । तर, नेपालमा माक्सवादलाई प्रदुर्षित बनाएको छ । नेपालको कम्युनिष्ट आन्दोलनहरुलाई पीढीमा बसेर कथा सुनाउने माध्यम मात्र भयो ।

पाठ्यक्रममा समावेश गर्नुपर्छ

कम्युनिष्ट आन्दोलनमा लागेका जिवित तथा शहिदहरुको योगदानको पाठ्यक्रममा समावेश गर्नु पथ्र्यो । पछि आउने नयाँ युवाहरुले त्यसलाई मनन् गर्ने थिए । १७ वर्ष जेल विताएका सानो दुर्गा अधिकारी, १४ वर्ष जेल बसेका खड्ग ओलीहरुलाई सम्झिए ।’

झापा कम्युनिष्टहरुको व्याड

नेपालमा समाजवाद ल्याउन झापाको युवाहरुबाट सम्भव रहेको उनको बुझाई छ । झापा कम्युनिष्टहरुको व्याड हो । उनका अनुसार झापाले ल्याउन सक्छ नयाँ सोच र विचार ।

शिक्षामा १० अर्व लगानी भए देश कायपलट

उनका अनुसार मानिसलाई इतिहास, समाज र कुलले बाधेको छ । धर्मले मानिसलाई कमजोर बनाउछ तर, शिक्षाले मानिसलाई असल बनाउछ । सरकारले शिक्षा क्षेत्रमा १० अर्व जति बजेट छुट्टाए १० वर्षमा देश कायपलट हुने उनको दावी छ । अहिलेसम्म शिक्षामा ५ प्रतिशत भन्दा बढी बजेट छुट्टाइएको छैन । भारत स्थित क्यारालाको उदाहरण दिँदै कार्कीले भने त्यहाँ २२ देखि २५ प्रतिशत बजेट शिक्षामा लगानी गर्छ ।

उनले भने–‘वर्षेनि नयाँ बजेट आउछ, त्यो खालि प्रक्रियाका लागि मात्र हो । पुरानो बजेटको खाँका च्यातर नयाँ मोडलको बजेट ल्याउन सक्नुपर्छ ।’

संघीय कर्मचारी ऐन खारेज गर्नुपर्छ : मेयर बुढाथोकी

कार्यक्रममा लेखक कार्कीले मेचीनगर नगरपालिकाका मेयर गोपाल चन्द्र बुढाथोकीलाई परम्परागत शैलीको पुरानो बजेट च्यातेर नयाँ प्रकृतिको बजेट ल्याउन समेत आग्रह गरेका थिए । मेयर बुढाथोकीले संघीय कर्मचारी ऐन खारेज गर्नुपर्छ अनि मात्र त्यो सम्भव हुने बताए ।

पुँजीवाद हाभी भयो : अशेष घिमिरे

कार्यक्रममा वक्ता नेकपा एकीकृत समाजवादीका केन्द्रीय सदस्य अशेष घिमिरेले विकल्प पुस्तक इतिहासको एउटा राम्रो दस्तावेज भएको बताए । उनका अनुसार २०७० सालपछि नवरउदारवादले लोकतन्त्रलाई गाँजेको छ । पुँजीवाद हाभी भयो ।
‘कम्युनिष्टहरुलाई विकल्पले प्रश्नै प्रश्न उठाएको छ’, घिमिरेले भने–‘लेखक कार्कीले जोखिम मोलेर पुस्तक प्रकाशन गरेका छन् । माओवादीका कमाण्डरहरु देशका नागरिकहरु बेच्दै हिडेका छन् । विकल्पलाई पुँजीवाद र त्यसका लठैतहरुले कब्जा गरेको छ ।’

जनवाद ल्याउन क्रान्ति मौलिक हुनुपर्छ : रमा भण्डारी

अर्का वक्ता नेकपा एमालेकी झापा जिल्ला सदस्य रमा भण्डारी ढकालले देशमा जनवाद ल्याउन क्रान्ति मौलिक प्रकारको हुँदा मात्र सम्भव रहेको दावी गरिन् । आर्थिक र राजनितीमा पारदर्शिता र माक्सवादी भए मात्र समाजवादमा पुग्न सकिने उनको दलिल छ ।
‘नेताहरु जनताप्रति एमानदार भएनन् । समतामुलक समाज निर्माणमा महिलालाई समावेशी करण गर्न कन्जुसाई गर्न हुँदैन’, उनले भनिन् ।

‘विकल्प’ दोसाँधमा उभिएको यात्री जस्तो : संगीत श्रोता

‘नेपालमा भएका आन्दोलनहरुको सार बुझ्न परे विकल्प पुस्तक एउटा दस्तावेजको रुपमा रहेको छ’, अध्येता संगीत श्रोताले भने–‘अबको समाज नयाँ जनवादी क्रान्तितर्फ लम्किरहेको आभाष हुन्छ ।

यो पुस्तक दोसाँधमा उभिएको यात्री जस्तो लाग्छ । लेखक कार्कीले पुराना पार्टीहरुको काम छैन । अब नयाँ क्रान्तिका लागि नयाँ पार्टी जन्माउन आवश्यक रहेको उहाँको ठम्याई छ ।’ कार्यक्रमको सहजिकरण रिडर्स झापाका सदस्य एवम् २०२८ साल झापा विद्रोहको लेखक निरज कट्टेलले गरेका थिए ।