झापा, ५ चैत । स्मृति, सम्मान र सत्प्रेरणालाई मुख्य लक्ष्य बनाएर झापामा स्थापित जय नेपाल प्रतिभा प्रोत्साहन प्रतिष्ठानले यस वर्षदेखि राष्ट्रिय स्तरको सम्मान वितरण गर्ने भएको छ ।
बिर्तामोड स्थित ग्रिण्ड फिल्ड वल्र्ड स्कूलको अडिटोरियममा सोमवार भएको पत्रकार सम्मेलनमा पूर्ण टुंग आर्दश नागरिक सम्मान–२०८० राष्ट्रिय प्रतिभा मदन कृष्ण श्रेष्ठ र हरिवंश आचार्य (महजोडी)लाई सम्युक्त रुपमा प्रदान गरिने जानकारी दिइएको छ ।
प्रतिष्ठानका अध्यक्ष गोपालकुमार वस्नेतको अध्यक्षतामा भएको कार्यक्रममा अध्यक्ष बस्नेतले आफ्ना पिता टुंगवहादुर वस्नेतको इच्छा अनुसार पूर्ण टुंग अक्षयकोष मार्फत एक लाख १२ हजार १ सय ११ रुपैयाँ नगदसहित पूर्ण टुंग आर्दश नागरिक सम्मान सर्मपण गरिने जानकारी दिए ।
आफ्नी आमा पूर्णकुमारी समेतको स्मृतिमा स्थापित अक्षयकोषबाट जय नेपाल प्रतिष्ठान मार्फत यही चैत ७ गते सो सम्मान वितरण गरिने छ । भारतीय नाट्यकर्मी सीके श्रेष्ठको प्रमुख आतिथ्यतमा आयोजित कार्यक्रमकाबीच महजोडीलाई सो सम्मान प्रदान गर्न लागिएको पत्रकार सम्मेलनमा जानकारी गराइएको थियो ।
भारतको दार्जिलिङ जिल्ला कालेङ्पोङ्गका स्थायी वासिन्दा श्रेष्ठ नाट्य कलाकार, नाटककार, कवि, गीतकार, राजनेता, राजनीतिक चिन्तक र कुशल संठगक हुन् । पत्रकारिता र साहित्यका क्षेत्रका समेत स्थापित श्रेष्ठ भारत र नेपालका अनेक सम्मानबाट सम्मानित रहेको कार्यक्रममा जानकारी दिइयो ।
कार्यक्रममा पूर्ण टुंग अक्षयकोषका संस्थापक सदस्य जितेन्द्र वस्नेतले अक्षयकोषका बारेमा जानकारी दिँदै आफ्ना पिताले जीवनकालमै लोक कल्याणका निमित्त कोष स्थापना गरिदिएको बताएका थिए ।
प्रतिष्ठानका उपाध्यक्ष राजकुमार पोखरेलले सहजीकरण गरेको कार्यक्रममा सञ्चाकर्मीहरुले विभिन्न जिज्ञासा राखेका थिए । कार्यक्रमको स्वागत प्रतिष्ठानका सचिव लक्ष्मण ढकालले गरेका थिए ।
Discussion about this post