बिर्तामोड, २१ चैत । गोर्खा फाउण्डेशन बिर्तामोडले ‘विशे नगर्ची राष्ट्रिय व्यक्तित्व सम्मान–२०८०’ बाट पाँच जना उत्कृष्ट व्यक्तित्वहरुलाई सम्मान गरेको छ ।
झापाका सामाजिक व्यक्तित्व महेन्द्रकुमार गिरीसहित पाँच जनालाई बुधबार सम्मान प्रदान गरिएको हो ।
राष्ट्र निर्माता पृथ्वीनारायण शाहका आर्थिक सल्लाहकार भनिएका विसे नगर्चीको योगदानलाई स्मरण गर्दै उनको स्मृतिमा स्थापना गरेको ‘विसे नगर्ची राष्ट्रिय व्यक्तित्व सम्मान सामाजिक अभियन्ता तथा सहकारीकर्मी गिरीसहित पाँच जनालाई प्रदान गरिएको छ ।
सम्मानित हुनेहरुमा वरिष्ठ चलचित्र निर्देशक तुलसी घिमिरे, महानायक राजेश हमाल, काठमाडौंकी पूर्व प्रमुख जिल्ला अधिकारी सीता परियार र भूवनसिंह विश्वकर्मा रहेका छन् । विश्वकर्मा अन्टार्टिका महादेश पुग्ने पहिलो नेपाली नागरिक हुन् ।
जनही ५१ हजार पुरस्कार राशिसहित उनीहरुलाई कार्यक्रमका प्रमुख अतिथि राष्ट्रिय सभा सदस्य गोपालकुमार बस्नेतले सम्मानपत्र प्रदान गरेका थिए ।
गोर्खा फाउण्डेशनका अध्यक्ष वीरवहादुर दर्नालको अध्यक्षतामा सम्पन्न कार्यक्रमको स्वागत फाउण्डेशनका महासचिव रञ्जित परियारले गरेका थिए ।
Discussion about this post