सहिद विश्वनाथ र विरेन मार्ग बनाउन निर्माण कम्पनीसँग सम्झौता

मेचीनगर, ७ जेठ । मेचीनगरको दुई वटा ठुला महत्वपूर्ण गौरवको आयोजना मध्ये सूर्योदय (सहिद विश्वनाथ घिमिरे) मार्ग चौध महिनामा कालोपत्रे सक्ने गरि निर्माण कम्पनीसँग सम्झौता भएको छ ।

आज मेचीनगर नगरपालिका र झापाको कनकाई अन्र्तराष्ट्रिय विल्डर्स प्रालि सुरुङ्गासँग सहिद विश्वनाथ मार्ग कालोपत्रे बनाउने गरि सम्झौता भएको हो ।

नगरपालिकाका मेयर गोपालचन्द्र बुढाथोकी, उपमेयर मीना पोखरेल उप्रेतीको रोहवरमा प्रमुख प्रशासकीय अधिकृत अग्निप्रसाद अधिकारी र कनकाई अन्र्तराष्ट्रिय विल्डर्स प्रालिका तर्फबाट व्यवस्थापक लीलाराज सिलवालले सम्झौता पत्रमा हस्ताक्षर गरेका हुन् ।

सम्झौता अनुसार निर्माण कम्पनीले विश्वनाथ मार्गको कालोपत्रे सडक आगामी १५ जुलाई २०२५ मा नगरपालिकालाई हस्तान्तरण गर्नु पर्ने छ । बिश्व बैंकको लगानीमा बन्ने सहिद विश्वनाथ मार्ग कनकाईले ३० करोड ८७ लाख ५७ हजार ९१८ रुपैयाँ २० पैँसामा ठेक्का पारेको छ ।

कनकाईले मेचीनगर–६ को काँकरभिट्टा स्थित बर्मेली टोलदेखि वडा नम्बर ५ र ४ को बाहुनडाँगी सम्मको ८ किलोमिटर ३८० सेन्टिमिटर सडक बनाउनु पर्ने छ ।

बुधवार सहिद विरेन मार्गको सम्झौता

यता मेचीनगरको अर्को ठुलो महत्वपूर्ण गौरवको आयोजना सहिद विरेन राजबंशी (सहिद विरेन मार्ग) मार्ग चौध महिनामा कालोपत्रे सक्नु पर्नेछ ।

सहिद विरेन मार्गको ठेक्का भारतको श्रीराम टावर कनकारवाग कम्पनीले लिएको छ । उक्त कम्पनीले सहिद मार्गको कालोपत्रे सडक आगामी १५ जुलाई २०२५ मा सक्नु पर्ने छ । सहिद विरेन मार्ग कनकारवाग कम्पनी २७ करोड २१ लख ३ हजार ९३१ रुपैयाँ ७० पैँसामा ठेक्का पारेको छ ।

उक्त कम्पनीले मेचीनगर–१० को धुलाबारीदेखि वडा नम्बर ९ को थोप्लेविरान सामुदायिक वन सम्मको ५ किलोमिटर ४७० सेन्टिमिटर सडक निर्माण गर्नु पर्ने छ ।

नगरपालकाले ७ जनवारी २०२४ मा उक्त सडकहरुको टेण्डर आह्वान गरेको थियो । सोही अनुसार अब चाडै निर्माण कम्पनीले सर्वे गरेर काम सुरु गर्नेछ । यसअघि नगरपालिकाले डीपीआर समेत तयार गरिसकेको छ ।

आउँदो बुधवार भारतको कनकारवाग कम्पनीसँग नगरपालिकाले सहिद विरेन मार्ग सडकको कालोपत्रे बनाउने सम्झौता गरिने बरिष्ठ प्रशासकीय अधिकृत अनन्तप्रकाश वस्तीले जानकारी दिए ।

कार्यक्रममा मेयर बुढाथोकी, उपमेयर उप्रेती, प्रमुख प्रशासकीय अधिकृत अधिकारीले २ वटै ठुला सडक २० वर्षसम्म टिक्ने पूर्वपश्चिम राजमार्ग बाहेक नगरको पहिलो गौरवको आयोजना रहेकाले सबै नगरवासीले सहयोग गर्न आगह गरेका छन् ।

सोही अवसरमा नगरका फोकल पर्सन एवम् इन्जिनियर जीवन भट्टराई, सुपरीवेक्षण, तथा गुणस्तर नियन्त्रण इन्जिनियर अजितकुमार चौधरी यता कनकाई विल्डर्स प्रालिका व्यवस्थापक सिलवाल, कन्टेयाकटर इन्जिनियर विदुर मैनाली लगायतले दुई वटै सडकका विषयमा जानकारी गराएका थिए । कार्यक्रमको सहजीकरण बरिष्ठ प्रशासकीय अधिकृत वस्तीले गरेका थिए ।