सामुदायिक विद्यालयलाई विद्यार्थी बोक्न गाडी दिँदै मेचीनगर

।। अर्जुन कार्की ।।

मेचीनगर, ५ साउन । टाडा टाडाबाट सामुदायिक विद्यालयमा पढ्न आउँने विद्यार्थीहरुको सहजताका लागि मेचीनगर नगरपालिकाले लागत सहभागितामा सवारी साधान उपलब्ध गराउन थालेको छ ।

यातायात सुविधा पुगेको ठाउँमा विद्यालयबाट टाडा घर भएका वस्तीका लक्षित वर्गका विद्यार्थीका लागि विद्यालयलाई विद्यार्थी बोक्न नगरपालिकाले सवारी साधान उपलब्ध गराउन थालेको हो ।

नगरपालिकाले पनि शैक्षिक गुण्स्तर राम्रा भएका सामुदायिक विद्यालयलाई विद्यार्थीहरु समयमा विद्यालय आउन र समयमा नै घर पुगुन भन्ने उदेश्यले साना तथा ठुला गाडीहरु दिइरहेको छ ।

बाल सुवोधिनिलाई म्याजिक भ्यान

नगरपालिकाले मेचीनगर–१४ को बाल सुवोधिनि माध्यमिक विद्यालयलाई १० देखि १५ जनासम्म अट्ने म्याजिक भ्यान दिने तयारी गरेको छ ।

मेचीनगर–१४ का वडाध्यक्ष बाबुलाल सुब्बाले २६ लाख ५० हजार रुपैयाँ मुल्य बराबरको म्याजिक भ्यान बाल सुवोधिनि माविलाई हस्तान्तरण गर्न लागिएको जानकारी दिए । उनका अनुसार वडा कार्यालयको १७ लाख ५० हजार र नगरपालिका कार्यालयको ९ लाखमा उक्त विद्यालयलाई भ्यान दिने तयारी गरिएको छ ।

‘अहिले विद्यालयहरु बन्द छन्’ वडाध्यक्ष सुब्बाले भने–‘विद्यालय खोलेपछि उक्त गाडी हस्तान्तरण गरिनेछ । टाडा टाडाबाट पढ्न आउँने विद्यार्थीलाई सुविधाका लागि गाडी उपलब्ध गराइने छ ।’

बाल सुवोधिनि माविका प्रधानाध्यापक विश्व थापाले २ वर्षअघि नगरपालिकामा गाडी माग गरेका थियौँ, प्रक्रिया पुरा गर्न समय लाग्यो । विद्यालय खोलेपछि नगरपालिकाले उक्त गाडी हस्तान्तरण गर्ने कार्यक्रम रहेको जानकारी दिए । उने भने–‘विद्यालयको बजेट नभएकाले गाडी आएपछि टाडाबाट आउँने विद्यार्थीका अभिभावकहरुलाई चालक र तेलका लागि सामान्य खर्च उठाइने छ ।’

गाडी भएपछि टाडा टाडाका विद्यार्थीहरुलाई समयमा ल्याउन र लान सहज हुने उनको भनाई छ । उक्त विद्यालय जिल्लामा नै उत्कृष्ट सामुदायिक विद्यालयको रुपमा परिचित छ । यसअघि नगरपालिकाले धुलाबारी मावि र काँकरभिट्टा माविलाई पनि ४० जना विद्यार्थी अट्ने ठुलो बस ल्याउन स्वीकृति दिएको छ ।

धुलाबारी माविको बस आउँदै

धुलाबारी माविका सहायक प्रधानाध्यापक तेजप्रसाद चौलागाईले नगरपालिका र विद्यालयको ५०÷५० प्रतिशत लागत सहभागितामा बस ल्याउन लागिएको बताए ।

उनका अनुसार नेपाल सरकारले भन्सार छुटमा एउटा बसको करिव ३० लाख रुपैयाँ पर्नेछ । त्यसमा १५ लाख विद्यालयले व्यहोर्ने गरी गाडी विरगंज भन्सारमा आइपुगेको छ । उक्त बस ल्याउन सिप्रदीको टाटा कम्पनीलाई ठेक्कामा दिएको छ । यसअघि पनि धुलाबारी माविले आन्तरिक श्रोतबाटै स्थानीय यातायात व्यवसायीको २०१४ मोडलको १४ लाखमा गाडी खरिद गरिसकेको छ ।

काँकरभिट्टा माविको प्रक्रियामा

त्यस्तै काँकरभिट्टा माविले पनि नगरपालिकासँगको सहकार्यमा आगामी कात्तिक महिनामा गाडी ल्याउने गरी तयारी गरिएको प्रधानाध्यापक हरि न्यौपानेले जानकारी दिए ।

यातायातको सुविधा भएपछि विद्यार्थी लिन गाडी घर–घरमा पुग्ने भएको छ । गाडी घरमै लिन आउँने भएपछि विद्यार्थीहरु उत्साहित हुने भएका छन् । दैनिक घण्टौँ लगाएर विद्यालय पुग्ने विद्यार्थी अहिले छोटो समयमा नै पुग्छन् भने समयमै घरमा फर्किने वातावरण पनि बन्ने छ ।

नगरपालिका शिक्षा शाखा प्रमुख एवम् उपसचिव होमनाथ भण्डारीले मेचीनगरका सामुदायिक विद्यालयहरुले बसको डिमाण्ड धेरै गरेको बताए ।

‘बाल सुवोधिनि माविलाई नगरपालिका र वडा कार्यालय मार्फत म्याजिक भ्यानको व्यवस्था गरिएको छ’, भण्डारीले भने–‘धुलाबारी मावि र काँकरभिट्टा माविलाई ५०÷५० प्रतिशत लागत सहभागितामा हो । धुलाबारीलाई भुक्तानी गरिएको छ, धुलाबारीको गाडी चाँडै आउछ । काँकरभिट्टा माविको प्रक्रियामा छ, केहि समय लाग्छ ।’

सरस्वती प्राविले माग्यो सिटी रिक्क्सा

मेचीनगर–७ स्थित सरस्वती प्राविले पनि विद्यार्थी बोक्न २ वटा सिटी रिक्साको लागि नगरपालिकामा निवेदन दिएको भण्डारीको भनाई छ । त्योसो त नगरका ४२ वटा सामुदायिक विद्यालयमध्ये केहिले आफ्नै आन्तरिक श्रोतबाट बस खरिद गरेर विद्यार्थी बोकिरहेका छन् ।

सामुदायिक विद्यालयहरुलाई संस्थागत विद्यालयहरुको दाँजोमा प्रतिस्प्रधा गर्न गारो नै छ । तर, पनि अब सामुदायिक विद्यालयहरुले पनि शैक्षिक गुणस्तर र यातायात क्षेत्रमा प्रगति गर्दै लगेको शिक्षासेवीको बुझाई छ ।