बिर्तामोड, २० साउन । प्रभु बैंकको बिर्तामोड शाखाले निक्षेपकर्ता मन्जुकुमारी नेपालले पेश गरेको मुद्दती रसिद, ब्यालेन्स सर्टिफिकेट र स्टेटमेण्ट नक्कली भएको बताएको छ ।
प्रभु बैंकले आज एक विज्ञप्ति जारी गरेर मन्जुकुमारी नेपालले मुद्दती रसिदको रकम फिर्ता पाउँ भनी पेश गरेको निवेदन अनुसारको रकम सम्बन्धित खातामा नरहेको जानकारी प्राप्त हुनासाथ आन्तरिक छानविन गर्दा उक्त मुद्दती रसिद, ब्यालेन्स सर्टिफिकेट र स्टेटमेण्ट बैंकबाट जारी गरिएको नभई अनधिकृत एवम् नक्कली रहेको उल्लेख छ ।
पत्रकार टिकाराम नेतिले बिर्तामोडको प्रभु बैंकको शाखामा मुद्दति बचत गरेको आफ्नो परिवारको (मन्जुकुमारी नेपाल) एक करोड १९ लाख मध्ये २ लाख मात्र खातामा रहेको दावी गरेका थिए ।
केहि दिनअघि पत्रकार सम्मेलनमा नेतिले आफ्नो पत्नीसहित अमेरिका भ्रमणमा जानु केहि दिनअघि उनले पत्नी मञ्जुकुमारी नेपालको नाममा उक्त रकम बैंकको मुद्दति खातामा ६ महिनाका लागि बचत गरेको दावी छ ।
मुद्दति बचतको अवधि पूरा (परिपक्व) भएपछि बैंक जाँदा आफ्नो खातामा रकम नभएको उनले पत्रकार सम्मेलनमा जानकारी गराएका थिए ।
उनले बैंक र प्रहरीमा उजुरी दिँदै आफ्नो बचत फिर्ताको माग गरेका थिए । प्रभु बैंक बिर्तामोड शाखाका बजार व्यवस्थापक चन्द्रगढी निवासी प्रमोद सिटौला भने हालसम्म फरार रहेको बताइएको छ ।
प्रभु बैंकले ग्राहकले बैंकमा राखेको मुद्दती निक्षेप सम्बन्धित खातामा नभएको भन्ने सम्बन्धमा विभिन्न समाचार माध्यमहरुमा प्रसारित समाचारप्रति गम्भिर ध्यानाकर्षण भएको जनाएको छ ।
सो सम्बन्धमा बैंकले थप छानविन भैइरहेको र कानुन बमोजिम अनुसन्धान गरी दोषी उपर कारवाहीका लागि आवश्यक प्रक्रिया अगाडि बढाईसकिएको बताएको छ ।
देशैभर ३१४ शाखा कार्यालयहरु र २८३ एटिएम समेतको सञ्जाल मार्पmत अत्याधुनिक प्रविधिसहित गुणस्तरीय बैंकिङ्ग सेवा प्रवाह गरिरहेको प्रभु बैंकले आप्mना निक्षेपकर्ता, ग्राहक तथा सेवाग्राहीहरुको हितमा सदैव कटिबद्ध रहने विज्ञप्तिमा उल्लेख छ ।
विज्ञप्तिमा आवश्यक छानविन तथा प्रचलित कानुन बमोजिमको कारवाही पश्चात उक्त घटनाको सत्य, तथ्य र वास्तविकता पत्ता लागि दोषी उपर ठहरे बमोजिमको कारवाही हुने नै छ भन्नेमा बैंक विश्वस्त रहेको उल्लेख छ ।
आइतबार जारी विज्ञप्तिमा प्रभु बैंकका कोशी प्रदेश प्रमुख बद्रीकुमार कटवालको हस्ताक्षर रहेको छ ।
जिल्ला प्रहरी कार्यालय झापाका प्रमुख एसपी मिलन केसीले यो विषय अदालत जाने बताए । यसअघि पीडित टिकाराम नेतिले प्रहरीमा निवेदन दिएका छन् ।
उनका अनुसार बैँकले आज प्रारम्भिक छानविन गर्दा उक्त मुद्दती रसिद, ब्यालेन्स सर्टिफिकेट र स्टेटमेण्ट नक्कली रहेको दावी गरेको छ । बैंकका फरार कर्मचारी पक्राउ परेपछि धेरै कुरा थाहा हुने एसपी केसीको भनाई छ ।
Discussion about this post