काँकरभिट्टा, २१ साउन । बंगलादेशमा विद्यार्थीले गरेको आन्दोलनका कारण सामान लोड गरेका आयात– निर्यात हुने १९ वटा गाडी आज नाकामा रोकिएका छन् ।
बंगलादेशकी प्रधानमन्त्री शेख हसिना आन्दोलन चर्किएपछि देश छाडेर भारत आएका कारण आयात– निर्यात हुने उक्त गाडीहरुबीच बाटैमा रोकिएका हुन् ।
नेपाल पारवहन तथा गोदाम व्यवस्था कम्पनी लिमिटेड काँकरभिट्टाका प्रमुख सुवास पाण्डेले दुई देशबीचको आयात–निर्यातका सामान बोकेका गाडीहरू सोमबार नाकामा अलपत्र परेको जानकारी दिए ।
बंगलादेश भन्सारबाट छुटेका टिस्यु पेपर लोड गरेर ल्याएका ५ वटा गाडी बंगलाबन्धमा रोकिएको उनको भनाई छ ।
त्यस्तै नेपालबाट छुटेका उखुको खुदो (मोलासिस) लोड गरेका ११ वटा गाडी काँकरभिट्टा भन्सार यार्डमा रोकिएका छन् भने ३ वटा गाडी बंगलाबन्ध नाकामा रोकिएको पाण्डेले बताए ।
‘सुरुमा आन्दोलन हुँदा केही दिनसम्म आयात निर्यात रोकिएको थियो’, पाण्डेले भने–‘गत आइतबारदेखि विहीबारसम्म नियमित थियो । पछिल्लो ३÷४ महिना यता हप्तामा १०÷११ वटा गाडीहरु आउँ जाउँ भइरहेका थिए । शुक्रबार यता ४ दिनदेखि गाडीहरू रोकिएका छन् ।’
उनका अनुसार नेपालबाट काँकरट्टिा नाका हुँदै मुसुरोको दाल, जडिवुटिमा चिराँइतो, डाबर च्यवनप्रास लगायत वस्तुहरु बंगलादेश निर्यात हुने गरेको छ । यस्तै बंगलादेशबाट टिस्यु पेपर, जुट, मेडिसिन, धागो लगायतका सामानहरु नेपाल आयात हुने गरेको छ ।
काँकरभिट्टाबाट नेपालले साउन यता ११ दिनमा दुई लाख ६९ हजार ७९६ केजी सामान आयात गर्दा २० करोड ६५ लाख ६२ हजार ७३ रुपैयाँ मुल्य बराबरको कारोवार गरेको पाण्डेले बताए । उनका अनुसार पन्ध्र लाख ७३ हजार केजी सामान निर्यात गर्दा १ करोड ३५ लाख ८९ हजार ५६३ रुपैयाँको कारोवार गरेको छ ।
गतवर्ष ९५ हजार ६७२ केजी सामान निर्यात गर्दा १५ करोड १७ लाख ५ हजार ६३९ रुपैयाँ र ९ हजार ७२१ केजी सामान आयात गर्दा ३१ करोड ७४ लाख ५ हजार ११० रुपैयाँ मुल्य बराबरको कारोवार भएको कार्यालयले जनाएको छ ।
Discussion about this post