चारआली, २३ साउन । वन दिवसको अवसरमा सामुदायिक वन मेचीनगर महासंघ नेपालले वृक्षारोपण र वक्तृत्वकला सम्पन्न गरेको छ ।
आज झापामा रहेका सामुदायिक वन उपभोक्ता महासंघले पालिकास्तरमा कार्यक्रम गरेका हुन् । सोही अवसरमा बुधबार वृक्षारोपण र विद्यालयस्तरीय आजको सन्दर्भमा सामुदायिक वन सम्बन्धी वक्तृत्वकला प्रतियोगिता सम्पन्न गरेको छ ।
प्रमुख अतिथि मेचीनगर नगरपालिका मेयर गोपालचन्द्र बुढाथोकीले कार्यक्रम आयोजनास्थल मेचीनगर–१३ स्थित हातेमालो सामुदायिक वन (निचाझोडा) को परिसरमा वृक्षारोपण गरेका छन् ।
कार्यक्रममा नगरका १० वटा विद्यालय सहभागी थिए । छनौटमा उत्कृष्ट स्थान प्राप्त गर्ने ३ जना विद्यार्थीलाई पुरस्कृत गरिएको थियो ।
प्रथम हुने धुलाबारी माविकी दिब्या राय, द्वित्तीय हुने पारिजात पब्लिक स्कुलकी जयन्ती बुढाथोकी र तृतीय हुने सरस्वती बालकल्याणकी दिव्यश्वरी भट्टराईलाई जनही नगद १ हजार र ५ सय रुपैयाँले पुरस्कृत गरेको छ ।
विजेतालाई सामुदायिक वन उपभोक्ता महासंघ कोशी प्रदेश अध्यक्ष तुलसी संग्रौला, झापा अध्यक्ष बेदप्रकाश भण्डारी, नगर अध्यक्ष जानुका ओली लगायतले पुरस्कार वितरण गरेका थिए ।
प्रतियोगिताको निर्णायकमा प्राध्यापक प्रेमसागर घिमिरे, डिभिजन वन कार्यालय झापाका अधिकृत डिल्लीराम खरेल र सञ्चारकर्मी राजकुमार ओली रहेका थिए ।
छनौटमा परेका ३ जना विद्यार्थीले २५ गते शुक्रबार जिल्लास्तरमा हुने प्रतियोगिताको फाइनल चरणमा सहभागी बन्नेछन् । पालिका महासंघमार्फत छनौट भएका १८ जना फाइनलमा प्रतिस्पर्धा हुनेछ ।
कार्यक्रमका प्रमुख अतिथि मेचीनगर नगरपालिका मेयर गोपालचन्द्र बुढाथोकीले विगतमा शून्य अवस्थामा रहेका सामुदायिक वनहरुले काँचुली फेर्दै गरेको बताए ।
उनले सामुदायिक वनहरूले जंगलको रोकथाम र पर्यावरण जोगाउँन अहम भुमिका खेलेको दावी गरे । बुढाथोकीले मेचीनगर क्षेत्रलाई हरित क्षेत्र घोषणा गर्नु पर्ने बताए ।
कार्यक्रममा मेचीनगर नगरपालिकाका प्रमुख प्रशासकीय अधिकृत अग्निप्रसाद अधिकारी, जिल्ला वन महासंघ झापा अध्यक्ष बेदप्रकाश भण्डारी, वडा नम्बर १३ का वडाध्यक्ष कृष्णप्रसाद सिग्देल लगायतले शुभकामना मन्तव्य व्यक्त गरेका थिए ।
सामुदायिक वन मेचीनगर महासंघ नेपालका अध्यक्ष जानुका ओलीको अध्यक्षतामा सम्पन्न कार्यक्रमको स्वागत उपाध्यक्ष यमाकान्त प्याकुरेल र सञ्चालन महासचिव खेमराज राई र सचिव युवराज रेग्मीले संयुक्त रुपमा गरेका थिए ।
Discussion about this post