सडक मानवको उद्धार गर्दै मेचीनगर

मेचीनगर, ७ भदौ । बेवारिसे अवस्थामा सडक पेटीमा भौतारिरहेका तीन जना सडक मानवको मेचीनगर नगरपालिकाले उद्धार गरेको छ ।

मेचीनगर नगरपालिका मेयर गोपालचन्द्र बुढाथोकी, उपमेयर मीना पोखरेल उप्रेती लगायतको टोलीले मेचीनगर क्षेत्रमा बेवारिसे अवस्थामा सडक पेटी र मठमन्दिरमा रहदै आएका सडक मानवहरुलाई उद्धार गरेका हुन् ।

विभिन्न कारणले बेवारिसे अवस्थामा अव्यवस्थित रूपमा कष्टकर जीवन विताइरहेका मेचीनगर–७ मदन वस्तीका कृष्ण राजवंशी, इलाम बरबोटेका तुलसी गौतम र ठेगान नखुलेका चत्रुधन मिश्रलाई मदन वस्ती र काँकरभिट्टाबाट विहीबार उद्धार गरिएको थियो ।

उनीहरुलाई मेयर बुढाथोकी, उपमेयर उप्रेती, मानव सेवा आश्रमका होमनाथ तिमल्सिनाको नेतृत्वमा रहेको टोलीले मेचीनगर–४ बाहुनडाँगी स्थित मानव सेवा आश्रममा लगेका थिए ।

उद्धार गरिएकालाई आश्रममा पुर्याएर सरसफाइ गरी, लत्ताकपडा फेरि, खाना खुवाएर टोली फर्किएको थियो । सडक मानवहरूलाई उचित रूपमा खाने, बस्ने र बिरामी हुँदा औषधि उपचारको व्यवस्था मिलाइएको छ ।

मेचीनगरसहित झापा जिल्लालाई सडक मानव मुक्त बनाउने अभियान अन्तर्गत मानव सेवा आश्रमलाई अगाडि बढाउन अघिल्लो आर्थिक बर्षमा २५ लाख बजेट विनियोजन गरिएको थियो । चालु आर्थिक बर्षमा पनि १० लाख बजेट विनियोजन गरिएको नगरपालिकाले जनाएको छ ।

मेचीनगरको सहजीकरणमा कनकाई नगरपालिकामा बसेको पालिका स्तरीय बैठकबाटै जिल्लाका कनकाई नगरपालिका, भद्रपुर नगरपालिका, बिर्तामोड नगरपालिका, अर्जुनधारा नगरपालिका र बुद्धशान्ति गाउँपालिका लगायतले पनि यस कार्यमा सहकार्य गर्न केही बजेट समेत विनियोजन गरिसकेका छन् ।

आश्रममा २१ जना पुगे

स्थानीय रामबहादुर प्रधान दम्पतीले दुई विगाह ५ कठ्ठा जग्गा दान गरेपछि सोही जग्गामा अहिले मानव सेवा आश्रम सञ्चालनमा आएको छ । उक्त आश्रममा हालसम्म उद्धार गरिएका २१ जना सडक मानवलाई रेखदेख गरिरहेको छ ।

यसअघि पनि मेचीनगरले सडक मानवहरुलाई उद्धार गरेर विराटनगर र बाहुनडाँगीको आश्रममा पुर्याएको थियो ।