मेचीनगर, ५ असोज । चारआली चोकदेखि चन्द्रगढी जाने सडक दुई किलोमिटर दक्षिणमा रहेको सिलगुडी–झापा पेट्रोलियम पाइपलाइन तथा भण्डार गृह निर्माण परियोजनाको विवादित जग्गामा आज नापजाँच गरिएको छ ।
जिल्ला अदालत झापाले पन्ध्र दिनअघि उक्त परियोजनाको विवादित जग्गामा नापजाँच गर्न आदेश दिएपछि शनिबार नापजाँच गरिएको हो ।
परियोजनाको २३ विगाहा ३ कठ्ठा १३ धुर जग्गा मध्ये छत्रबहादुर कार्की, रिता कार्की र राजु कार्कीबाट खरिद गरिएको ४ विगाहा जग्गा मध्ये २ विगाहा जग्गामा विवाद भएको थियो ।
कार्की परिवारले ४ विगाहा जग्गा बाहेक थप २ विगाहा जग्गा आफ्नै भएको दावी गरेर ३ महिनाअघि अदालतमा मुद्दा दायर गरेको थियो । अदालतले नापजाँच गर्न भनेपछि परियोजनाले आज घेराबारा गरेको जग्गाको चारै कुनालाई केन्द्रविन्दु बनाएर नापजाँच गरेको छ ।
नेपाल आयल निगमका उपनिर्देशक एवम् परियोजनाको जग्गा संरक्षण समितिका संयोजक समेत रहेका प्रदीप यादवले कार्की परिवारको ४ विगाहा जग्गा मालपोतबाट पास गरेर जग्गा खरिद गरेको दावी गरे । उनका अनुसार ४ विगाहा मध्ये कार्की परिवारले २ विगाहा जग्गा आफ्नो दावी गरेर झापामा मुद्दा दर्ता गरेका छन् ।
परियोजनाले घेराबारा गरेको जग्गामा थप २ विगाहा जग्गा कार्की परिवारले आफ्नो परेको दावी गरेको छ । परियोजनाले २०८० फागुन ३० गते २३ विगाहा ३ कठ्ठा १३ धुरमध्ये कार्की परिवारसँग ४ विगाहा जग्गा खरिद गरेको उपनिर्देशक यादवको भनाई छ ।
परियोजनाले अदालतको आदेश अनुसार जिल्ला प्रशासन कार्यालय झापालाई निवेदन दिएपछि प्रशासनले नापीलाई पत्र पठाएको थियो । सोही पत्र अनुसार आज नापी कार्यालयले जग्गा नापजाँच गरेको छ ।
नाप जाँचका क्रममा कार्की परिवारको ठुलो समूहले अवरोध गर्न खोजेपनि दलबलका साथ आएको सशस्त्र प्रहरी, नेपाल प्रहरी र परियोजनाका कर्मचारीहरुको सहयोगमा नापी कार्यालयका कर्मचारीले जग्गा नापजाँच गरेको थियो ।
नापी कार्यालयले जग्गा नाप जाँचको रिपोर्ट अदालतमा बुझाएपछि त्यसको केहिदिनमा अदालतले आदेश गर्ने परियोजनाको बुझाई छ ।
उक्त परियोजनाको पाइप लाइनका लागि चारआली स्थित ग्रिनफिल्ड टर्मिनल निर्माणसहितका लागि करिव ९ अर्ब लाग्ने छ । उक्त परियोजनाका लागि भारत सरकारले अनुदान दिने छ । ४२ हजार किलोलिटर अट्ने भण्डारसहितको पाइप लाइन विस्तार हुनेछ ।
आगामी अक्टोबर १५ तारिखतिर उक्त परियोजनाका लागि नयाँ दिल्लीमा नेपाल र भारतका उच्च अधिकारीबीच सम्झौता हुने यादवको भनाई छ । त्यसपछि ठेक्का लागेपछि निर्माण काम धमाधम हुनेछ ।
हाल उक्त परियोजनामा करिव २ करोड लागतमा तार घेराबारा, कल्भट, ड्रेन, कार्यालय भवन, साइनबोर्ड, सुरक्षाका लागि ४ जना गार्ड राख्ने लगायतका काम भइरहेको छ । पहिलो चरणको प्रारम्भिक ठेक्का लोगेर काम सुरु भएको छ ।
भिडियो पनि हेर्नु होला ।
Discussion about this post