दलहरुले जेसीजबाट विधिको शासन सिक्नुपर्छ : मन्त्री कार्की

धुलाबारी, ११ असोज । कोशी प्रदेश सरकारका खानेपानी, सिँचाई तथा उर्जा मन्त्री एकराज कार्कीले विधिको शासन लागू गर्न सबै राजनीतिक दलहरुले जेसीजबाट सिक्नु पर्ने बताएका छन् ।

आज धुलाबारी स्थित पासाङ ल्हामु स्मृति प्रतिष्ठान टाउन हलमा नेपाल जेसीज वर्ष २०२४ को क्षेत्र ‘क’ सम्मेलनको उद्घाटन गर्दै उनले यस्तो कुरा बताएका हुन् ।

‘नेपाल जेसीजमा जसरी विधिको शासन अपनाउने गरिएको छ’, मन्त्री कार्कीले भने–‘त्यसरी नै सबै राजनीतिक दलहरुले पनि जेसीजको विधिलाई अनुशरण गर्नुपर्छ । जेसीजबाट सिक्नुपर्छ । सामाजिक र आर्थिक परिवर्तन युवाहरुको सहयोगमा मात्र सम्भव छ ।’

उनले भने ‘जेसीजमा एउटै व्यक्तिले नेतृत्व गरिरहदैन । समय भएपछि युवाहरुमा क्रमशः परिवर्तन र हस्तान्तरण गरिन्छ । नेताहरुले पनि सधैँ पद ओगटेर बस्न हुँदैन । एउटै व्यक्ति सधैँ एउटै पदमा बस्नु हुन्न । पद हस्तान्तरण आवश्यक छ । परिवर्तन आफैबाट सुरु गर्नुपर्छ ।’

कार्यक्रममा नेपाल जेसीज वर्ष २०२४ का राष्ट्रिय अध्यक्ष जेसीआई सिनेटर रविन पोखरेल, कोशी प्रदेशका सांसद गोपाल तामाङ, मेचीनगर नगरपालिकाकी उपमेयर मीना पोखरेल (उप्रेती) लगायतले शुभकामना मन्तव्य व्यक्त गरेका थिए ।

सम्मेलन आयोजक समितिका निर्देशक एवम् जेसीआई सिनेटर अनन्तप्रकाश वस्तीले कार्यक्रमको औचित्यमाथि प्रकाश पारेका थिए ।

नेपाल जेसीज वर्ष २०२४ का राष्ट्रिय कार्यकारिणी उपाध्यक्ष एवम् सम्मेलन समितिका सभापति जेसी भिमबहादुर कुँवरको अध्यक्षतामा सम्पन्न उद्घाटन सत्रको स्वागत धुलाबारी शाखाका अध्यक्ष मञ्जिल रसाईलीले, कार्यक्रमको सञ्चालन शाखाका महासचिव जेसी शिशिर पोखरेल र धुलाबारी जुनियर जेसीजका संस्थापक अध्यक्ष जेसी सुलभ भण्डारीले संयुक्त रुपमा गरेका थिए ।

उद्घाटन सत्रपछि पहिलो चरणमा नेपाल जेसीजको प्रकरण गोष्ठी भएको थियो । गोष्ठीमा डायनामिक पव्लिक लाईवेरीका संस्थापक अध्यक्ष भेषराज न्यौपाने, धुलाबारी जेसीज वर्ष २००१ का अध्यक्ष जेसी तेजप्रसाद चौलागाई र नेपाल जेसीज वर्ष २०१६ का राष्ट्रिय कार्यकारिणी उपाध्यक्ष जेसी भेषजा काफ्लेले ईनिटेक्ट, ईनोभेट र ईमपेक्टका विषयमा आ–आफ्ना धारणा व्यक्त गरेका थिए ।

त्यस्तै, आज राति जेनेरल एसेम्ली, सिनेटर वैठक, जुनियर जेसीजको वैठक, अन्तर शाखा वक्तृत्वकला र जेसीज नाइट हुनेछ ।

यसैगरी दोस्रो शनिबारका कार्यक्रमहरुमा तालिम, जेनेरल एसेम्ली, नेपाल जेसीजको अवार्ड वितरण, समापन र विभिन्न क्षेत्रका १७ वटा उपसमिति निर्माण हुने धुलाबारी शखाका उपाध्यक्ष शैलेश गौतमले जानकारी दिए ।

क्षेत्र ‘क’ का ४२ वटा शाखा, जुजियर जेसीज १६ वटा, देशभर तथा नेपाल जेसीजका पदाधिकारीसहित करिव ६०० जना जेसीहरुको सहभागिता रहेको छ । लगातारको वर्षाका कारण केहि सहभागीहरु आउन पाएनन् भने केहि आउने क्रम जारी छ ।

क्षेत्र क सम्मेलनको मुख्य उदेश्य वैदेशिक रोजगारमा विदेश जान लागेका युवाहरुलाई रोकेर आफ्नै देशमा उद्यमशिल बनाउने रहेको छ ।