पूर्वेली र लखनपुर भेट्रान्स सेमिफाइनलमा

इलाम, ७ कात्तिक । पूर्वेली भेट्रान्स बिर्तामोड र दमक लखनपुर भेट्रान्स इलामको सूर्योदय नगरपालिका–५ समाल्बुङमा जारी दोस्रो गोरख भेट्रान्सको सेमिफाइनलमा प्रवेश गरेको छ ।

सामसुङ मेमोरियल मैदानमा जारी प्रतियोगिता उद्धघाटन खेलमा पूर्वेली बिर्तामोडले गत संस्करणको उपविजेता एमसीसी भेट्रान्स फिक्कललाई ४–२ गोल अन्तरले हराएको हो ।

खेलको सूरुवाती अग्रता फिक्कलले लिएको थियो । सुजन राईले पहिलो हाफको १९ औँ मिनेटमा गोल गरे । दोस्रो हाफको सुरुवाती मिनेटमा सन्तोष राईले खेल बराबरी गरे ।

चौथो मिनेटमा प्रविन विश्वकर्माले फिक्कललाई अग्रता दिलाए । १० औँ मिनेटमा कर्ण लिम्बुले फ्रिकिक मार्फत खेल बराबरीमा ल्याए । बराबरी भएको एक मिनेट नवित्दै सन्तोष राईले व्यक्तिगत दोस्रो गोल गर्दै बिर्तामोडलाई अग्रता दिलाए ।

दोस्रो हाफको १६ औँ मिनेटमा राजकुमार विकले गोल गरेपछि ४–२ गोल अन्तरको जितका साथ बिर्तामोडले अन्तिम चारमा स्थान सुरक्षित गरेको हो । खेलको म्यान अफ दि म्याच बिर्तामोडका सन्तोष राई घोषित भए ।

दोस्रो खेलमा दमक लखनपुरले पाहुना टोली दार्जिलिङको जिजे भेट्रान्सलाई ३–२ गोल अन्तरले हराएको हो । लखनपुर दमकको तर्फबाट सुवास आङथुपोले २ र विकास राईले १ गोल गरे । दार्जिलिङका गौतम थापा र अर्जन राईले गोल गरे । खेलको म्यान अफ दि म्याच सुवास आङथुपो घोषित भए ।

प्रतियोगिताको तेस्रो क्वाटरफाइनल खेलमा बरमियोक नाम्पिङ सिक्किम र आयोजक गोरख भेट्रान्स तथा चौथो क्वाटरफाइनल खेलमा युएफसी भेट्रान्स बुङकुलुङ भारत र फेमेगुरु भेट्रान्स सन्दकपुरबिच प्रतिस्पर्धा हुनेछ ।

अध्यक्षता गोरख भेट्रान्स कपका संरक्षक राजु बम्जनको अध्यक्षतामा भएको कार्यक्रममा इलाम क्षेत्र नं २ का सांसद एवम स्र्पोटिङ इलाम एफसी डी मेचीका अध्यक्ष सुहाङ नेम्वाङको प्रमुख आतिथ्यता रहेको थियो ।

कार्यक्रममा सूर्योदय नगरपालिका–२ का वडाध्यक्ष एवम सामाजिक विकास समिति संयोजक डिक बम्जन, वडा नं ५ का वडाध्यक्ष उर्गेन बम्जन, रोङ गाउँपालिका–६ का वडाध्यक्ष सत्यम चौरासेको विशेष आतिथ्यता रहेको थियो ।

कार्यक्रममा प्रमुख अतिथि नेम्वाङले विकास र समृद्धिका लागि खेलकुद महत्वपूर्ण रहेको बताए । उनले खेलकुद विकासमा आफ्नो तर्फबाट सहयोगको प्रतिवद्धता समेत जनाए । नेम्वाङले समाल्बुङ क्षेत्रमा पर्यटन र खेलकुदको सम्भाव्य क्षेत्र भएको बताए ।

विशेष अतिथि डिक बम्जनले नगरपालिकाले खेलकुद विकासलाई प्राथमिकतामा राख्दै अन्तर मावि फुटबल सञ्चालन गरिरहेको बताए । उनले खेलकुद स्वास्थ्यका लागि समेत महत्वपूर्ण रहने बताए ।

कार्यक्रममा गोरख युनाइटेड क्लबका सचिव निरोज बम्जनले गरेका थिए । प्रतियोगिता गोरख टोल विकास संस्थाको आयोजना र गोरख युनाइटेड क्लबको सहआयोजनामा भएको हो ।