‘सरकारको १०० दिनभित्र शान्ति प्रक्रिया टुंगोमा पुग्यो’

झापा, ८ कात्तिक । नेकपा एमालेका उपमहासचिव प्रदीप ज्ञवालीले पार्टी अध्यक्ष केपी शर्मा ओली प्रधानमन्त्रीत्वको वर्तमान सरकारले सत्य निरुपण तथा मेलमिलाप सम्बन्धी ऐन बनाएर सशस्त्र द्वन्द्वमा पीडितका परिवारले विगत १७ वर्षदेखि गरेको अपेक्षालाई सम्बोधन गरेको बताएका छन् ।

नेकपा एमाले झापा जिल्ला कमिटीले आज पार्टी कार्यालय बिर्तामोडमा आयोजना गरेको अगुवा कार्यकर्ता भेलालाई सम्बोधन गर्दै उपमहासचिव ज्ञवालीले यस्तो कुरा बताएका हुन् ।

उनले विगत १७ वर्षदेखि थाँती रहेको शान्ति प्रक्रियाको एउटा मूलभूत कार्य वर्तमान सरकारले १०० दिनको अवधि भित्रै पूरा गरेको बताएका छन् ।

सरकारको समीक्षा गर्न १०० दिनको अवधि अत्यन्त थोरै हो तर पनि सकारात्मक काम गरेर ओली नेतृत्वको सरकारले जनताको मन जितेको उनको भनाई छ ।

वर्तमान सरकारले व्यवसायीमा भरोषा बढाइदिएको बताउँदै नेता ज्ञवालीले सोको उदाहरणका रुपमा पूँजी बजार अर्थतन्त्रमा आएको सुधार कारण रहेको दावी गरे ।

पार्टीका जिल्ला अध्यक्ष प्रेम गिरीको अध्यक्षतामा आयोजित सो कार्यकर्ता भेलामा उनले झापा जिल्लाको समसामयिक राजनीतिक अवस्थितिका बारेमा प्रकाश पारेका थिए ।

जिल्ला कमिटीका उपाध्यक्ष शिव ढुंगेलले स्वागत राख्दै उपमहासचिव समक्ष राष्ट्रिय राजनीतिमा वर्तमान अवस्था, पार्टी कार्यकर्ताको भूमिकाका सम्बन्धमा प्रकाश पारेका थिए ।

कार्यकर्ताहरुले सोधेका जिज्ञासाहरु ज्ञवालीले प्रष्ट्याएका थिए । उनले पार्टीको जिम्मेवार तहमा रहेका कार्यकर्ताहरुलाई प्रष्टसँग भनेका छन– बायोडाटामा जिम्मेवारी देखाउन मात्र कमिटीमा नबसेर जिम्मेवारी लिएको पदमा रहेर तोकिएको काम गर्न निर्देशन दिएका थिए ।