मन्त्री कार्कीद्वारा नहर र सतिघट्टा खानेपानीको निरीक्षण

मेचीनगर, २४ कात्तिक । कोशी प्रदेश सरकारका खानेपानी, सिँचाइ तथा उर्जा मन्त्री एकराज कार्कीले आज मेचीनगर–७ को कालीपालीमा निर्माणधिन नहर र सतिघट्टा खानेपानी उपभोक्ता समितिको कार्यालय निरीक्षण गरेका छन् ।

पातञ्जल योग समिति काँकरभिट्टा साधना केन्द्रले आयोजना गरेको योग अभिमुखिकरण कार्यक्रमको उद्घाटन सकेर मन्त्री कार्की सोझै मेचीनगर–७ को कालीपालीमा निर्माणधिन नहरको अवलोकन गर्न गएका हुन् ।

७ करोड ७६ लाखमा ठेक्का लागेको ३ वर्षअघि नै सम्पन्न हुनु पर्ने एक किलोमिटर लामो सो नहरको निर्माण कार्य अझै सकिएको छैन । सतिघट्टा चिया बगानका अझै दुई ठाउँमा चेम्बर लगाउन बाँकी छ ।

ठेकेदारले आगामी पुस मसान्तमा सक्ने गरी तयारी गरेको छ । तर, स्थानीय उपभोक्ताहरुले नहरसम्म जाने र आउने सडक छेउका सार्वजनिक जग्गालाई समेटर सडक विस्तार गर्नु पर्ने माग मन्त्रीसँग राखेका थिए । समयमा नहर सम्पन्न नभएका कारण स्थानीयले खेतीयोग्य जमिनमा सिँचाइ गर्न पाएका छैनन् ।

अब करिव ५० लाख रुपैयाँको बजेट भए नहर व्यवस्थित हुने मेचीनगर–७ का वडाध्यक्ष प्रह्लादमणि ओलीको भनाई छ । मन्त्री कार्कीले सडक डिभिजन कार्यालय दमकका प्रमुख श्यामसुन्दर यादवलाई सोही ठाउँबाट फोन गरेर नहरका विषयमा जानकारी लिएका थिए ।

मन्त्री कार्कीले भिओ गरेर भएपनि र गतवर्षमा नहरको काम सम्पन्न गर्न डिई यादवलाई निर्देशन दिएका थिए ।

यसैगरी, मन्त्री कार्कीले सतिघट्टा खानेपानी उपभोक्ता समितिको कार्यालय पनि निरीक्षण गरेका छन् । बजेट अभावले खानेपानीको पाइप लाइन विस्तार गर्न नसकेको गुनासो स्थानीयले सुनाएपछि मन्त्रीले वडा, नगरपालिकाबाट सिफारिस लिएर आएपछि मन्त्रालयमा सक्ने सहयोग गर्ने बताए ।

करिव दुई किलोमिटर पाइप विस्तार गर्न सके समस्या समाधान हुने स्थानीय एवम् नेकपा एमालेका युवा नेता चन्द्र प्रसाईले मन्त्रीलाई कुरा राखे ।

मन्त्री कार्कीसँगको निरीक्षण टोलीमा मेचीनगर नगरपालिकाका मेयर गोपलालचन्द्र बुढाथोकी, उपमेयर मीना पोखरेल उप्रेती, ७ नम्बर वडाध्यक्ष ओली, एमालेका नेता रविन कोइराला, चन्द्र प्रसाई, बन्धनकुकमार मुण्डा, काँकरभिट्टा खानेपानी उपभोक्ता समितिका अध्यक्ष रोहितकुकमार बुढाथोकी, नेकपा माओवादी केन्द्रका नेता माधव अर्याल, समाजसेवी पुष्प पौडेल लगायत स्थानीयहरुको उपस्थिति रहेको थियो । मेयर बुढाथोकी भने खुट्टाको समस्याले गाडीमा नै बसेका थिए ।

भिडियो पनि हेर्नु हो । डिईसँग कुरा गर्दै मन्त्री ।