मेचीनगर, २४ कात्तिक । ‘शारिरिक स्वास्थ्य, मानसिक शान्ति, बौद्विक विकास र आध्यात्मिक उन्नती’ को नारासहित काँकरभिट्टामा योग अभिमुखिकरण कार्यक्रम सुरु भएको छ ।
पातञ्जल योग समिति काँकरभिट्टा साधना केन्द्रको आयोजनामा मेची सामुदायिक भवनको हलमा शनिबारदेखि मंसिर १ गतेसम्म ८ दिवसिय योग अभिमुखिकरण कार्यक्रम सुरु भएको हो ।
आज विहान योग अभिमुखिकरण कार्यक्रमको उद्घाटन कोशी प्रदेश सरकारका खानेपानी, सिँचाइ तथा उर्जा मन्त्री एकराज कार्कीले गरेका थिए ।
मन्त्रीले कार्कीले मानिसलाई स्वास्थ्य रहन जसरी योगको आवश्यकता पर्छ, त्यसरी नै मुलुकमा अराजनीतिक रुपमा रहेको अराजकतालाई सुधार्न यस्तो योग शिविरहरुबाट पाठ सिक्नु पर्ने बताए ।
कार्यक्रममा प्रमुख अतिथि मन्त्री कार्की, मेचीनगर नगरपालिकाकी उपमेयर मीना पोखरेल उप्रेती, नेपाली कांग्रेस निकट नेपाल महिला संघकी केन्द्रीय सदस्य बिना तामाङ, पातञ्जल योग समिति कोशी प्रदेश अध्यक्ष जिपी तिवारी, योग प्रशिक्षक सुवर्णलाल चित्रकार लगायतले योगका विषयमा चर्चा गरेका थिए ।
कार्यक्रममा नेकपा एमालेका नेता रविन कोइराला, मेचीनगर नगरपालिकाका मेयर गोपालचन्द्र बुढाथोकी लगायत समाजिक संघ–संस्थाका प्रतिनिधि र प्रमुखहरुको उपस्थिति रहेको थियो ।
मानिसले खानपान र आहारविहारलाई ध्यान नदिएर सुखी दिनचर्यामा जीवनयापन गरिरहेको कारण दिनप्रति दिन विरामी बढेकाले स्वास्थ्य रहन योग आवश्यक रहेकोले शिविर सञ्चालन गरिएको केन्द्रको भनाई छ ।
योग अभिमुखिकरण कार्यक्रममा सहभागीहरुलाई योग प्रशिक्षक चित्रकारले प्रशिक्षण दिनु हुनेछ । उनले आज योग शिविरमा सहभागी १२० जनालाई प्रशिक्षण दिनु भएको थियो । ८ दिनसम्म विहान र बेलुका १ घण्टासम्म योग शिविर सञ्चालन हुने छ ।
पातञ्जल योग समिति कोशी प्रदेशको समन्वयमा सुरु योग अभिमुखिकरण कार्यक्रमममा मेचीनगर नगरपालिका–६ र ७ नम्बर वडा कार्यालयको सहयोग रहेको छ ।
पातञ्जल योग समिति काँकरभिट्टा साधना केन्द्रकी अध्यक्ष नारायणी पाण्डेको अध्यक्षतामा सम्पन्न उद्घाटन सत्रको स्वागत उपाध्यक्ष सिता गुरुङ र सञ्चालन केन्द्रकी प्रशिक्षक अनिता गुरागाईले गरेकी थिइन् ।
फोटो : देबेन्द्र खरेल
Discussion about this post