बिर्तामोड महोत्सवमा अवलोकन गर्नेको घुईचो

झापा, १२ माघ । एपोलो पेन्ट्स बिर्तामोड अन्तराष्ट्रिय औद्योगिक व्यापार महोत्सवमा अवलोकन गर्नेहरुको घुईचो बढ्दै गएको छ ।

स्वदेश तथा विदेशमा उत्पादित बस्तुहरुको खरिद र अवलोकनका लागि महोत्सवमा अवलोकन गर्नेहरको भीड बढ्न थालेको हो ।

महोत्सव स्थलमा उपस्थिति बाक्एिसँगै व्यवसायीहरु उत्साहित देखिएका छन् । किचन सामग्री र स्वरोजगार मूलक उद्यमका उत्पादनमा ग्राहकको विशेष चासो देखिएको छ ।

शनिवार विदाको सदुपयोग गर्दै वालवालिका समेतको उपस्थितिमा ग्राहकहरु महोत्सवस्थल भीडभाड देखिन्न्थ्यो । महोत्सवको रौनक थप्न पोखराका नन्दनी साह चटपटे र भेलपुरी लिएर बिर्तामोड आएका छन् ।

यसअघि उनले धरान एक्सोमा पनि चटपटे र भेलपुरीको स्वाद चखाएका थिए । धनकुट्टा हिलेबाट ल्याइएको घरेलु ठेकी र तोङ्वासहितका घरायसी प्रयोजनका सामग्री बिर्तामोड महोत्सवमा आकर्षण बनेको छ ।

मौसममा आएको सुधारसंगै ग्राहकको उपस्थिति बाक्लिएपछि महोत्सवमा खरिद बिक्री बढेर गएको व्यवसायी थीरमाया राउतको भनाई छ । महोत्सवस्थलको किड्स जोनमा पनि वालवालिकाहरु खेल सामग्री प्रयोग गर्दै रमाई रहेका देखिन्छन् । महोत्सवलाई थप आकर्षण दिन यस पटक मुख्य प्रवेशद्वार विशेष प्रकारले डिजाइन गरिएको छ ।

मुख्य मञ्च अगाडि झापाकै प्रशिद्ध तीर्थस्थल अर्जुनधारा जलेश्वर धामको चित्र झल्कने मन्दिरको आकृति राखिएको छ । सेल्फी लिने र टिकटक बनाउने मुख्य आकर्षकका रुपमा ति डिजाइनले साथ दिएको छ । माघ १९ गतेसम्म सञ्चालन हुने महोत्सव अवधिभर विभिन्न जात जाति र भेषभूषाका सांस्कृतिक प्रस्तुतिहरु नियमित रहेका छन् ।

शनिवार राई जातिका कलाकारहरुले सांस्कृतिक प्रस्तुति राखेका थिए । जातीय भेषभूषामा सजिएर आएका उनीहरुले दिनभर मौलिक संस्कृतिको जर्गेनाका लागि छलफलसहित प्रस्तुति र प्रर्दशन गरिरहेको महोत्सव आयोजक समितिका संयोजक विशाल थापाले बताए ।

प्रत्येक साँझ प्रशिद्ध कलाकारहरुले वेजोड साङ्गीतिक प्रस्तुति राखिरहेको बिर्तामोड उद्योग वाणिज्य संघले जनाएको छ । साँझ संगीतमा रमाउने युवा–युवतीहरुको उपस्थिति उल्लेख्य रहदै आएको छ ।