मेचीनगर, ६ फागुन । मेचीनगर नगरपालिका, नगर कार्यपालिकाको आज बसेको वैठकले मुख्य चार वटा निर्णयहरु गरेको छ ।
मंगलबार विहान मेचीनगर नगरपालिकाका नगरप्रमुख गोपालचन्द्र बुढाथोकीको अध्यक्षतामा बसेको वैठकले जनतासँग प्रत्यक्ष सरोकार राख्ने मुख्य चार वटा विषयहरुमा निर्णय गरेको हो ।
मेचीनगर नगरपालिकाका प्रवक्ता एवम् वडा नम्बर २ का वडाध्यक्ष दिपक बरालले कोशी प्रदेश सरकारले योजना बैंक तयार गर्न स्थानीय तहहरुसँग योजनाहरुको विवरण माग गरे अनुसार पहिलो निर्णय भएको जानकारी दिए ।
योजना बैंक तयार गर्ने
उनका अनुसार नगरका सबै वडाहरुमार्फत योजना तथा कार्यक्रमको विवरण संकलन गरी संकलित योजना तथा कार्यक्रमको विवरण नगर योजना बैंक तयार गरेर कोशी प्रदेश योजना बैंकमा सिफारिस गर्ने निर्णय गरिएको छ ।
निजी, साझेदारी र सञ्चार क्षेत्रको ऐन बनाउने
दोस्रो, नेपालको संविधान र स्थानीय सरकार सञ्चालन ऐन, २०७४ ले स्थानीय तहलाई दिएको काम, कर्तव्य र अधिकारभित्र रहेको सार्वजनिक निजी, साझेदारी र सञ्चार क्षेत्रलाई व्यवस्थित गर्न ऐन निर्माण गर्न सैदान्तिक सहमति प्रदान गर्ने निर्णय भएको प्रवक्ता बरालले बताए ।
वीपी र सहिद विरेन छात्रवृतिको बजेट कार्यान्वयन गर्ने
तेस्रो, वीपी कोइराला छात्रवृति र सहिद विरेन राजबंशी छात्रवृतिका लागि विनियोजित बजेट कार्यान्वयन गर्ने निर्णय गरेको छ ।
समपूरक कोष र विशेष अनुदानका योजनाको सिफारिस
र, चौँथो संघीय सरकारले स्थानीय तहलाई समपूरक कोष र विशेष अनुदानको रुपमा उपलब्ध गराउने योजनाहरु सिफारिस गर्ने निर्णय भएको उनको भनाई छ ।
आज बसेको वैठकले चार वटा मुख्य निर्णयसहित जनतासँग प्रत्यक्ष सरोकार राख्ने थप निर्णयहरु नगरपालिकाको वेवसाइटमा हेर्न सकिने उनले जानकारी दिए ।
Discussion about this post