आलु खेती प्रर्बद्धनमा चासो राख्दै मेचीनगर (भिडियोसहित)

मेचीनगर, १२ फागुन । मेचीनगरका विभिन्न वडामा आलु खेती गरिरहेका कृषकहरूलाई आलु खेती प्रर्बद्धनका लागि नगरपालिकाले चासो देखाएको छ ।

आइतबार दिउँसो नगरप्रमुख गोपालचन्द्र बुढाथोकीको नेतृत्वमा गएको टोलीले मेचीनगर–१५ नम्बर वडाका विभिन्न ठाउँका कृषकलाई भेटेर आलु खेती प्रर्बद्धनका लागि चासो देखाएको हो ।

वडा नम्बर १५ का कृषकहरुले उत्पादनसँग जोड दिन आलु खेतीका लागि नगरपालिकासँग अनुदान माग गरेका छन् ।

माग गरेका दस वटा फर्म र व्यक्तिगत किसानहरूले निवेदन दिएका थिए । त्यसमध्ये चार वटा फर्मको प्रस्तावलाई प्रक्रियाको तयारीका लागि नगरप्रमुख बुढाथोकीको टोलीले निरीक्षण तथा अनुगमन गरेको छ ।

निवेदन दिएका मध्ये चार वटा फर्मका कृषकले आलु खेती कसरी गरिरहेका छन् र त्यसको प्रर्बद्धनका लागि पनि स्थलगत निरीक्षण गरिएको उनको भनाई छ ।

मेचीनगर–१५ को कृष्ण र शिव भेटवालको न्यु भेटवाल कृषि फर्म, रामहरि नेपाल र लिला खनालको नेपाली बाबू कृषि स्मार्ट फर्म, रूहिदास राजबंशीको भांगासीतु कृषि फर्म र रमेश राईको चामलिङ कृषि फर्मको अनुगमन गरिएको छ ।

टोलीमा नगरप्रमुख बुढाथोकी, आर्थिक विकास शाखा प्रमुख दिपेन्द्र कार्की, कृषि शाखा प्रमुख टेकेन्द्र प्रधान, आर्थिक विकास समिति सदस्य खेमकुमार सुब्बा लगायत रहेका थिए ।

स्थानीय कृषकले खेतमा नै आएका नगरप्रमुख बुढाथोकीको टोलीलाई आलुका विभिन्न विरुवा र विउँका विषयमा जानकारी गराएका थिए ।