विकासका योजनामा सबै एक ढिक्का बनौँ : सांसद शर्मा

धुलाबारी, १७ फागुन । नेपाली काँग्रेसका महामन्त्री विश्वप्रकाश शर्माले झापाका सबै पालिकाका जनप्रतिनिधिलाई विकास निर्माणका योजनामा एक ढिक्का भएरअघि बढ्न आग्रह गरेका छन् ।

आज धुलाबारी खानेपानी उपाभोक्ता समितिको २४ औँ वार्षिक साधारण सभाको गमलाको फुलमा धाराको पानी हालेर उद्घाटन गरिएको कार्यक्रममा उनले यस्तो कुरा बताएका हुन् ।

झापा–१ का प्रतिनिधि सभाका सांसद समेत रहेका प्रमुख अतिथि शर्माले झापामा आएका साना ठुला योजनाहरुमा पालिकाहरु एकमत हुनु पर्ने बताए ।

‘देशमा संघीयता आएपछि मात्रै पूर्वाधार विकासक्रमले तीब्रता पाएको छ’, सांसद शर्माले भने–‘स्थानीय तह, प्रदेश सरकार र केन्द्र सरकारले पूर्वाधार विकास निर्माणका योजनामा बजेट बिनियोजन गरेको छ । प्रधानमन्त्री र सभामुखको क्षेत्र पनि भएकाले मेचीनगरमा दुइवटा ठुला विकासका गौरवको योजना निर्माणाधिन अवस्थामा रहेको छ ।’

कार्यक्रममा मेचीनगर नगरपालिकाकी उपप्रमुख मीना पोखरेल उप्रेतीले नगरभित्रका खानेपानी संस्थाले उपभोक्तासँग लिइने शुल्क समान हुनु पर्ने बताइन् । उनले नगरका खानेपानी संस्थाहरुलाई ब्यवस्थित गर्न मर्ज गरेर लानु पर्नेमा जोड थियो ।

कार्यक्रममा धुलाबारी खानेपानीका संस्थापक अध्यक्ष राम कट्टेल, पत्रकार चन्द्र भण्डारी, नेकपा एकिकृत समाजबादी पार्टीकी केन्द्रीय सदस्य सविता भण्डारी भेटवाल, चारआली साना शहरी तथा खानेपानी उपभोक्ता संस्थाका अध्यक्ष राजन चिमरिया लगायतले शुभकामना मन्तव्य राखेका थिए ।

२०५२ सालमा स्थापना भएको धुलाबारी खानेपानी उपाभोक्ता समितिको हाल ६ हजार २४५ जना उपभोक्ता रहेका छन् । संस्थालाई विश्व बैंकमार्फत नेपाल सरकारबाट २० करोड बजेट बिनियोजन गरेको छ ।

धुलाबारी खानेपानी उपाभोक्ता समितिका अध्यक्ष धनकाजी खत्रीको अध्यक्षतामा सम्पन्न कार्यक्रमको स्वागत उपाध्यक्ष हिमालय आङ्दाम्बेले र सञ्चालन सचिव उमानाथ सुवेदी (उमेश) ले गरेका थिए ।