मेचीनगर, २१ चैत । भोलिदेखि मेचीनगरमा सामुदायिक कुकुरहरुको निःशुल्क बन्ध्याकरण शिविर सञ्चालन हुँदैछ ।
पोखरा स्थित राष्ट्रिस्तरको गैरसरकारी संस्था हार्ट नेपाल (हिमालयन एनिमल रेस्क्यु ट्रष्ट) सँगको प्राविधिक सहकार्यमा शुक्रबारदेखि ८ दिनसम्म मेचीनगरका सामुदायिक कुकुरहरुको निःशुल्क बन्ध्याकरण शिविर सञ्चालन हुने भएको हो ।
मेचीनगर–८, ईटाभट्टा स्थित आदर्श मावि परिसरमा आयोजना हुने शिविरमा हार्टका प्राविधिक चन्द्र आङबु राईको नेतृत्वमा १२ जना र नगरपालिकाका ८ जना स्वास्थ्य प्राविधिकको टोली शिविरमा खटिने भएका छन् ।
नगरपालिकाका प्रवक्ता एवम् वडा नं.२ का वडाध्यक्ष दिपक बरालले सामुदायिक तथा घरमा पालेका कुकुरहरुको दिगो व्यवस्थापन मार्फत तिनीहरुको कारण हुनसक्ने क्षति, जोखिम न्युनिकरण, भयरहित बाताबरण र प्राणघातक रोग रेविज लगायत जुनोटिक रोग (पशुबाट मानिसमा र मानिसबाट पशुमा सर्ने) उन्मुलन गर्ने उदेश्यले भोलिदेखि ८ दिनसम्म निःशुल्क बन्ध्याकरण शिविर सञ्चालन गर्न लागिएको जानकारी दिए ।
कुकुरलाई मानव मैत्री बनाउने लक्ष्यसहित करिव ४५० वटा सामुदायिक कुकुरहरुको बन्ध्याकरण गरिने आर्थिक विकास शाखा प्रमुख दिपेन्द्र कार्कीले बताए ।
उनका अनुसार प्राविधिक टोलीले ३ वटा पिकअफ गाडी मार्फत प्रत्येक वडामा गएर सामुदायिक कुकुरहरु समातेर शिविरमा ल्याइने छ । त्यसका लागि सबै नगरबासीलाई सहयोग गर्न आग्रह कार्कीले गरेका छन् ।
नगरपालिकाले निकट भविश्यमा मेचीनगरका कुकुरहरुको लगत संकलन गर्ने, ट्याग र डिजिटल चिप्स् लगाउने योजना रहेको उनले बताए । मेचीनगरमा करिव १० हजार सामुदायिक र ८ हजार घरपालुवा कुकुरहरु रहेको अनुमान गरिएको छ ।
Discussion about this post