संविधान संशोधन गर्न ढिलो गरे ‘संविधान फेल’ हुन सक्छ : नेता खरेल

बिर्तामोड, २३ चैत । नेकपा एमालेका स्थायी कमिटी सदस्य एवम् पूर्व कानुनमन्त्री अग्निप्रसाद खरेलले संविधान संशोधन गर्न ढिलो गरे ‘संविधान फेल’ हुन सक्ने बताएका छन् ।

शनिवार बिर्तामोडमा प्रेस चौतारी नेपाल झापा शाखाले आयोजना गरेको पत्रकार भेटघाटमा खरेलले यस्तो बताएका हुन् ।

संविधान संशोधन गर्न जति ढिलो हुन्छ त्यति नै संविधान ‘फेल’ हुने संभावना रहेकाले अब संशोधनका लागि दलहरूले छलफल गर्न ढिलो गर्न नहुने उनको तर्क छ ।

प्रधानमन्त्री केपी शर्मा ओलीका मानव अधिकार तथा संक्रमणकालीन न्याय सम्बन्धी सल्लाहकार समेत रहेका खरेलले लोकतन्त्र आएपछि र निरंकुशताको बेलाको देशको चित्रमा धेरै भिन्नता रहेको बताए ।

उनले समानुपातिक निर्वाचनबाट निर्वाचित सांसदहरू राष्ट्रिय सभाको रुप पनि दिन सकिने बताए । उनले भने, ‘त्यो भएन भने प्रत्यक्ष निर्वाचन प्रणालीमै कोटा निर्धारण गर्न सकिन्छ । तर, यो निर्वाचन प्रणालीले स्थिर सरकार दिन सकिन्छ भन्ने आधार छैन । तर, यो मेरो व्यक्तिगत विचार हो ।’

नेता खरेलले विगत र वर्तमानको देशको अवस्था तुलना गरेर हेर्न समेत आग्रह गरेका छन् । देशमा विद्यमान मिश्रित निर्वाचन प्रणाली नै स्थिर सरकारका लागि बाधक भएको उनको भनाई छ ।

उनले भने –‘चैत १५ गते राजावादीहरुको कार्यक्रम सरकारले शान्तिपूर्ण हुने अपेक्षा गरेको थियो । तर, कार्यक्रम हिंस्रक र विध्वंशकारी बन्न पुग्यो । प्रहरीले अति नै संयमता अपनाउदा पनि दुई जनाले ज्यान गुमाउनु परेको थियो ।’

आन्दोलन अराजक, हिंसात्मक हुँदा धनजनको क्षति धेरै भएको बताउँदै उनले त्यत्रो क्षति हुँदा पनि अहिलेसम्म पूर्वराजा ज्ञानेन्द्र शाहले दुख व्यक्त गरेका छैनन् ।

‘जनताको ठुलो बलिदानीबाट मुलुकमा परिर्वन संभव भएको हो’, खरेलले भने–‘यो २१ औं शताब्दी राजतन्त्रको शताब्दी होइन, निरंकुशताको शताब्दी होइन । जे कमजोरी छ हामी सच्याउन तयार छौं ।’

प्रेस चौतारीका झापा अध्या प्रदीप परियारको अध्यक्षतामा सम्पन्न पत्रकार भेटघाटमा एमालेका केन्द्रीय सदस्य एवम् झापा इन्चार्ज रोमनाथ ओली, केन्द्रीय सदस्य इन्द्र भण्डारी, झापा अध्यक्ष प्रेम गिरी लगायतको उपस्थिति रहेको थियो ।