सहकारी संघ झापा अध्यक्षमा कोइरालाको मात्र उम्मेदवारी

झापा, २४ चैत । आगामी चार वर्षे कार्यकालका लागि झापा जिल्ला सहकारी संघको नयाँ नेतृत्व चयन प्रक्रिया सुरु भएको छ ।

जिल्ला सहकारी संघको बिर्तामोड स्थित सम्पर्क कार्यालयमा शनिबार भएको मनोनयन दर्ता कार्यक्रममा संघको अध्यक्ष पदमा हालका उपाध्यक्ष प्रेमकुमार कोइरालाको मात्र उम्मेदवारी दर्ता भएको छ ।

यसैगरी वरिष्ठ उपाध्यक्षमा दुर्गाप्रसाद सापकोटाको मात्र उम्मेदवारी दर्ता भएको छ । निर्वाचन समितिले प्रकाशन गरेको उम्मेदवारहरूको पहिलो नामावली विवरण अनुसार एकजना खुल्ला उपाध्यक्ष पदमा तीन जनाको र एकजना महिला उपाध्यक्ष पदमा दुई जनाको उम्मेदवारी परेको छ ।

जस अनुसार खुल्ला उपाध्यक्ष पदमा नारायणप्रसाद भट्टराई, डिल्ली दाहाल र अर्जुनकुमार दंगाल तथा महिला उपाध्यक्षमा देवी निरौला बस्नेत र चन्द्रकला अधिकारीले मनोनयन दर्ता गराएका छन् ।

जिल्ला संघको एकजना सचिव पदमा तीन जनाको उम्मेदवारी परेको छ । सचिव पदमा भवानीप्रसाद दंगाल, युवराज गिरी र लक्ष्मीप्रसाद बास्कोटाले उम्मेदवारी दर्ता गराएका छन् ।

सहसचिवमा एक जनाका लागि टसबहादुर श्रेष्ठ र विनोद ढकालको उम्मेदवारी परेको छ भने कोषाध्यक्ष पदमा केशवप्रसाद बस्नेतको मात्र उम्मेदवारी दर्ता भएको छ । उम्मेदवारहरूको प्रथम सूची अनुसार अध्यक्ष, वरिष्ठ उपाध्यक्ष र कोषाध्यक्ष निर्विरोध निर्वाचित भएका छन् ।

सञ्चालक समितिको सदस्यमा ४ जना महिला अनिवार्य हुने गरी ७ जनाका लागि उम्मेदवारी दर्ता गर्दा चार जना महिला सञ्चालक सदस्य पनि निर्विरोध निर्वाचित भएका छन् । तर, खुल्ला तीन जनाका लागि ६ जनाले मनोनयन दर्ता गराएको प्रथम नामावली सूचीमा उल्लेख छ ।

निर्विरोध भएका महिला उम्मेदवारहरूमा बिन्दाकुमारी थापा, निलाकुमारी दाहाल, पुष्पा चौलागाईं अधिकारी र संगीता गजुरेल रहेका छन् । यता खुल्ला सदस्य पदमा चाहिँ प्रेमसागर सापकोटा, ढुण्डिराज गुरागाई, कृष्ण पौडेल, चक्रबहादुर लिम्बु, नारायणप्रसाद गौतम र काशीनाथ घिमिरेको मनोनयन दर्ता भएको छ ।

संघीय निर्वाचन क्षेत्र अनुसारका पाँच जना क्षेत्रीय सदस्यहरूमा क्षेत्र नम्बर १ बाट देवीमाया अधिकारी निर्विरोध निर्वाचित भएकी छन् । क्षेत्र नम्बर २ बाट युवराज गौतम र लवकुमार चौधरीले मनोनयन दर्ता गरेका छन् ।

यस्तै क्षेत्र नम्बर ३ मा क्षेत्रीय सदस्यका लागि हरिकृष्ण अधिकारीको मात्र मनोनयन दर्ता भएको छ भने क्षेत्र नम्बर ४ बाट तिलकप्रसाद सिंह राजवंशीको मनोनयन दर्ता भएको छ । उनीहरू दुवै निर्विरोध भएका छन् । क्षेत्र नम्बर ५ बाट सदस्य पदमा पदम लिम्बु लिङदेन र वीरेन्द्र पोखरेलको मनोनयन दर्ता भएको छ ।

संघको लेखा सुपरिवेक्षण समितिमा आठौं कार्यकालका लागि पनि महिला सदस्यमा उम्मेदवारी परेन । तर, संयोजकमा वर्तमान संयोजक चुडामणि ओझा र पूर्व सञ्चालक खडानन्द गुरागाईंले उम्मेदवारी दर्ता गराएका छन् । यस्तै सदस्य पदमा मिलन आचार्य र राजेन्द्रप्रसाद रिजालले मनोनयन दर्ता गराएका छन् ।