साना कक्षाका विद्यार्थीलाई दिक्षित गराउँदै होराइजन

मेचीनगर, १५ बैशाख । विद्यार्थीलाई पढाइमा प्रोत्साहन गर्ने लक्ष्यसहित धुलाबारीको इष्ट होराइजन अंग्रेजी माविले दिक्षान्त समारोह आयोजना गरेको छ ।

आज विद्यालयको सभाहलमा आयोजित अभिभावकहरुको उपस्थितिमा साना कक्षाका विद्यार्थीलाई दिक्षित गरिएको हो ।

भविष्यमा स्नातकोत्तर गरेपछि पाउने उपाधिको क्षणलाई सम्झना स्वरुप विद्यार्थीमाझ अभ्यास गरिएको विद्यालयका प्रिन्सिपल सन्जिव राईले बताए ।  यसले विद्यार्थीलाई पढाइमा प्रोत्साहन गर्ने उदेश्यले दिक्षान्त समारोह आयोजना गरिएको उनको भनाई छ ।

सोमबार कक्षा–२ र ३ का १०४ जना विद्यार्थीलाई दिक्षित गरिएको थियो । अभिभावकको उपस्थितिमा उनीहरुलाई कालो टोपी, फूल र प्रमाणपत्र पत्र वितरण गर्दै सम्मान गरिएको थियो ।

बुधबार कक्षा नर्सरीका ५१ जना, कक्षा–५ र ६ का १५३ जना विद्यार्थीलाई दिक्षित गरिने विद्यालयकी प्रमुख प्रशासक सावित्रा सापकोटाले बताइन् ।

कार्यक्रममा नेपाल पुष्पाञ्जली मन्टेश्वरी शिक्षालयकी प्रिन्सिपल मीरा शर्माले अभिभावकले नानीहरुलाई गर्ने व्यवहारका विविध विषयमा प्रस्तुती दिएकी दिइन् । उनले आफ्ना नानीबाबुहरुलाई असल संस्कार सिकाउन अभिभावकहरुको महत्वपूर्ण भूमिका रहने चर्चा गरिन् ।

सोही अवसरमा बिर्तामोड स्थित वीएण्डसी अस्पतालले स्वास्थ्य सम्बन्धी जानकारी दिएको छ वीएण्डसी अस्पताल र इष्ट होराइजनबीच यसअघि नै स्वास्थ्य सम्झौता भएको छ ।

सम्झौता अनुसार विद्यालयसँग जोडिएका विद्यार्थी, शिक्षक तथा कर्मचारी लगायतले उपचारमा विशेष छुटको सुविधा पाउनेछन् ।

वीएण्डसी अस्पतालका कार्यक्रम संयोजक गोविन्द खनाल र डा.नीता श्रेष्ठले अभिभावकहरुलाई आफ्ना नानीहरुलाई खानपानमा विशेष ध्यान दिन आग्रह गरेका थिए ।