दल र पत्रकारको सम्बन्ध पानी र माछाको जस्तो हुनु पर्छ : प्रेम गिरी

बिर्तामोड, २० बैशाख । नेकपा एमाले झापाका अध्यक्ष प्रेम गिरीले राजनीतिक दल र पत्रकारको सम्बन्ध पानी र माछाको जस्तो रहेको बताएका छन् ।

आज ३२ औँ विश्व प्रेस स्वतन्त्रता दिवसको अवसरमा नेपाल पत्रकार महासंघ झापा शाखालेआयोजना गरेको ‘प्रेस स्वतन्त्रताका लागि राजनीतिक दलहरुको प्रतिवद्वता’ कार्यक्रममा उनले यस्तो कुरा बताएका हुन् ।

‘राजनीतिक दललाई पत्रकार भएन भने पानी बिनाको माछा जस्तो हुन्छ’, अध्यक्ष गिरील भने–‘पत्रकारलाई पनि राजनीतिक दल चाहिँन्छ । त्यसैले राजनीतिक दल र पत्रकारको सम्बन्ध पानी र माछाको जस्तो हुनु पर्छ ।’

संविधान सभा सदस्य समेत रहेका उनले लोकतन्त्र व्यवस्थाको विकल्प नरहेको बताए । एमाले पार्टी पूर्ण प्रेस स्वतन्त्रताको पक्षमा रहेको उनको भनाई छ ।

कांग्रेस राजा राख्ने पक्षमा छैन् : केशवराज पाण्डे

कार्यक्रममा नेपाली कांग्रेस झापाका उपसभापति केशवराज पाण्डेले प्रेस स्वतन्त्रता विना लोकतन्त्र र प्रजातन्त्र सम्भव नहुँने दावी गरे । उनका अनुसार लोकतन्त्रको सुन्दर पक्ष भनेको नै स्वतन्त्रता हो ।

‘कांग्रेस राजा राख्ने पक्षमा छैन्’, पाण्डेले भने–‘धमिलो पानीमा माछा मार्न खोज्नेहरु धेरै छन् । त्यो सम्भव नहुँने कुरा हो । देशलाई अब आर्थिक क्रान्तिमा लानु पर्छ ।’

समाजमा के बिक्री हुन्छ सबै त्यतै : राजु आचार्य (अग्नि)

नेकपा माओवादी केन्द्र झापाका अध्यक्ष राजु आचार्य (अग्नि) ले समाजमा के राम्रोसँग बिक्री हुन्छ त्यतातिर नै सबै लाग्ने गरेकाले राजनीतिक दल र पत्रकारले पनि त्यहि गरिरहेको बताए ।

सबैले आत्मालोचना गरौँ : सम्भु सुस्केरा

राष्ट्रिय स्वतन्त्र पार्टी (रास्वपा) झापाका सचिव सम्भु सुस्केराले सबैले आ–आफ्नो ठाउँबाट आत्मालोचना गरेर अघि बढ्न आग्रह गरेका थिए ।

समाचार लेखेन भनेर थर्काउँदैनौँ : केशवकुमार ओझा

त्यस्तै राष्ट्रिय प्रजातन्त्र पार्टी (राप्रपा) झापाका अध्यक्ष केशवकुमार ओझाले संविधानभित्रै रहेर अग्रगमनको पक्षमा वकालत गरिरहेकोले स्वतन्त्र पत्रकारिताको विपक्षमा नरहेको बताए । पत्रकारले समाचार लेखेन भनेर थर्काउने, धम्काउन काम हामीबाट नहँुने उनको भनाई छ ।

भुईमान्छेको पक्षमा लाग्न आग्रह : वेदराज रेग्मी

नेकपा एकीकृत समाजवादी झापाका अध्यक्ष वेदराज रेग्मीले जति पनि समाचार संप्रेषण हुन्छ त्यो भुईमान्छेको पक्षमा स्वतन्त्र पत्रकारिता गर्न आग्रह गरेका थिए ।

११ प्रदेश माग : समरकुमार राई

यस्तै जनता समाजवादी पार्टी झापाका अध्यक्ष समरकुमार राईले देश जनसहभागितामुलक लोकतन्त्रको पक्षमा जानु पर्ने बताएका छन् । उनले ७ प्रदेशलाई बढाएर अझै ११ प्रदेश बनाउन समेत माग गरेका छन् ।

पत्रकार झोले हुन् : भोटुलाल राजवंशी

कार्यक्रममा जनमत पार्टी झापाका अध्यक्ष भोटुलाल राजवंशीले पत्रकार कसैको झोले नभएर चोखो र संगठित हुनु पर्ने बताएका छन् । पत्रकारहरुले साना दल र किसानहरुको पनि समाचार लेख्न आग्रह गरेका छन् ।

पत्रकार लोकतन्त्रको मेरुदण्ड : सुमन सिंह सि

यसैगरी, नेपाल कम्युनिष्ट पार्टी (विप्लव समूह) झापाका इन्चार्ज सुमन सिंह सिले लोकतन्त्रको मेरुदण्ड पत्रकार भएको बताए । उनले भत्किएको समाजलाई जोड्ने काम पत्रकारले गर्नु पर्ने बताए । त्यसैले नेपाली समाज यथास्थितिमा बस्न नसक्ने उनको जिकिर छ ।

पत्रकारहरु इमानदार हुनु पर्छ

अग्रज पत्रकार चन्द्र भण्डारी, माधव विद्रोहीले मोफसल र केन्द्रका साना–ठुला मिडिया र पत्रकारहरुले आफ्नो पेशाप्रति इमानदार भएर काम गर्नु पर्ने बताएका थिए ।

दलहरुको ५ बुँदे साझा प्रतिवद्धता

सोही अवसरमा राजनीतिक दलहरुले ५ बुँदे साझा प्रतिवद्धता पनि जनाएका छन् ।

१) संविधान प्रदत्त पूर्ण प्रेस स्वतन्त्रताको व्यवहारमै कार्यान्वयनका लागि प्रतिबद्ध छौं । साबै प्रेस स्वतन्त्रताको सम्मान, रक्षा र कार्यान्वयनका लागि सरकारसहित सबै सरोकारवालाको ध्यानाकर्षण गराउँदछौं ।

२) राज्यका तीनै तहमा सञ्चार सम्बन्धी कानूनहरु पूर्णरुपमा बनाएर कार्यान्वयन गर्न ध्यानाकर्षण गराउँदछौं । साथै झापाका १५ वटै स्थानीय सरकारलाई एक वर्षभित्र सञ्चार कानून निर्माण र कार्यान्वयन गर्न अपिल गर्दछौं ।

३) २०८१÷१२÷१५ गते काठमाडौंको तीनकुनेमा भएको पत्रकार सुरेश रजकको हत्याको छानविन गर्न, परिवारलाई क्षतिपूर्ति दिन, घाइते पत्रकारको निःशुल्क उपचार र क्षति पुर्याइएका सञ्चार माध्यमलाई उचित क्षतिपूर्तिको व्यवस्थाका लागि सरकारको ध्यानाकर्षण गराउँदछौं ।

४) पत्रकारको क्षमता वृद्धि तथा पत्रकार महासंघको संस्थागत विकास गर्दै मर्यादित र व्यावसयिक पत्रकारिताको विकासका लागि महासंघ र स्थानीय सरकारबीचको सहकार्यमा जोड दिदै त्यसका लागि राजनीतिक दलहरुको तर्फबाट आवश्यक सहयोग गर्ने प्रतिवद्धता व्यक्त गर्दछौं ।

५) झापाका पत्रकारको सामाजिक सुरक्षाका लागि महासंघले स्थापना गरेको पत्रकार सहारा उपचार कोषको वृद्धिका लागि झापाका राजनीतिक दलहरुको तर्फबाट समेत पहल गर्ने प्रतिबद्धता व्यक्त गर्दै कोषमा सहयोगका लागि सबै पक्षलाई अपिल गर्दछौं ।

नेपाल पत्रकार महासंघ झापा शाखाका अध्यक्ष एकराज गिरीको अध्यक्षतामा सम्पन्न कार्यक्रमको स्वागत उपाध्यक्ष सुब्रत न्यौपानेले र सञ्चालन सचिव राजु पाठकले गरेका थिए ।