महिला जनचेतनाले दियो तीन पालिकामा ‘कृषि तालिम’

मेचीनगर, २३ बैशाख । महिला र बालबालिकाको क्षेत्रमा काम गरिरहेको यहाँको एउटा सामाजिक संस्थाले कृषि क्षेत्रका किसानको पनि मर्म बुझ्न थालेको छ ।

मेचीनगर–६ स्थित काँकरभिट्टामा मुख्य कार्यालय रहेको महिला जनचेतना केन्द्रले विगत २० वर्षदेखि झापामा महिला तथा बालबालिकाको क्षेत्रमा काम गरिरहेको छ । यसपटक संस्थाले कृषि क्षेत्रमा किसानले के गरिरहेका छन् भन्ने बुझ्ने उदेश्यले कृषकमैत्री काममा जुटेको छ ।

गतहप्ता मात्रै संस्थाले हाई हिमालयन अर्गानिक प्रालिसँगको सहकार्यमा झापाको तीन वटा पालिकामा प्राङ्गारिक जीवाणु मल सम्बन्धी किसानलाई सचेतना मुलक कार्यक्रम दिएको थियो ।

झापाको मेचीनगर नगरपालिका, बाह्रदशी गाउँपालिका र कचनकवल गाउँपालिकाका कृषकहरुसँग प्रत्यक्ष भेटेर प्राङ्गारिक जीवाणु मलका विषयमा छलफल गरिएको महिला जनचेतना केन्द्रकी संस्थापक अध्यक्ष राधा प्रधान कार्कीले जानकारी दिइन् ।

‘महिला हिंसा, बाल विवाह लगायत महिलालाई गरिने विभेदका विषयमा वकालत गर्दै आएका छौँ,’–अध्यक्ष कार्कीले भनिन्–‘मानिसको स्वास्थ्यसँग जोडिएको विषय भएकोले कृषकसँग हातेमालो गरिएको हो । कृषकले उत्पादन गरेका वस्तु अर्गानिक होस् भन्ने उदेश्यले संस्था सहकार्यले गरेको छ । विषादीको मात्रा उच्च छ । त्यसलाई रोक्न यो कार्यक्रमले बल पुग्छ ।’

उनका अनुसार कृषकले नजाने कै कारण बारीमा युरिया, डीपीए मल प्रयोग गरिरहेका छन् । जुन मानिसका लागि घातक रहेको छ । जसले गर्दा क्यान्सर रोग समेत निम्ताएको छ । यसलाई रोक्न र कृषकलाई बुझाउन पनि प्राङ्गारिक जीवाणु मलको प्रयोग अनिवार्य छ ।
यही बैशाख १५ गते कचनकवल–५ र १ नं.वडाका ६० जना किसानलाई प्राङ्गारिक जीवाणु मलका विषयमा तालिम दिइएको संस्थाकी अध्यक्ष सीता गुरुङले बताइन् ।

यस्तै मेचीनगर–५, ६, ७ र ८ नं.वडाका ४० जना किसानलाई तालिम दिइएको थियो । त्यसैगरी बाह्रदशी–१ र ७ नं.वडाका ५० जना किसानलाई पनि तालिम दिइएको उनले बताइन् । तीन वटै पालिकाका सहभागी किसानहरुलाई हाई हिमालयन थ्रीस्टार प्राङ्गारिक जीवाणु मलका विषयमा प्रालिका सञ्चालक प्रदीप घिमिरे र सहजकर्ता लोकपृय खनालले प्रशिक्षण दिएका थिए ।

तालिममा सहभागी प्रत्येक किसानलाई २५ केजीको १ बोरा थ्रीस्टार धुलो मल, ५ लिटरको जरामा हाल्ने थ्रीस्टार झोल मल, अढाई लिटरको पातमा हाल्ने फोलियरको थ्रीस्टार झोल मल र अढाई लिटरको पातमा हाल्ने थ्रीस्टार झोल मल निःशुल्क वितरण गरिएको थियो ।

प्रालिका सञ्चालक घिमिरेका अनुसार अनेक थरिका विषादी मलका कारण माटोको क्षय भएकोले उत्पादन भएका अन्नमा असर पुग्यो । त्यस्ता प्रकारका अन्न खाएपछि मानिसलाई विभिन्न खालका रोग लाग्न थाल्यो । मान्छे विरामी नहुन् भनेर किसानलाई प्राङ्गारिक जीवाणु मलमा जोड दिन किसानलाई अनुरोध गरिएको छ ।

तीन वटै पालिकामा भएको सचेतना मुलक कार्यक्रममा जनप्रतिनिधि, कर्मचारी, राजनीतिक दलका प्रतिनिधि, बालबालिकाका अभिभावक, स्थानीय सामाजिक संघ–संस्थाका प्रतिनिधि, किसान लगायतको सहभागिता रहेको थियो ।

बाल विवाह तथा कम उमेरमा हुने विवाह न्यूनीकरण परियोजना अन्तर्गत अभिभावकसँग प्राङ्गारिक जीवाणु मल सम्बन्धी तीन वटै पालिकामा एक–एक दिन किसानलाई ‘कृषि तालिम’ प्रदान गरिएको अध्यक्ष कार्कीले बताइन् ।