मेचीनगर, २६ बैशाख । काँकरभिट्टाको सूर्योदय इङ्लिस बोर्डिङ स्कुलको ट्रुप लिडरको चुनावमा साइस्ना कोइराला र रिदम निरौला निर्वाचित भएका छन् ।
आज स्कुलमा सम्पन्न ट्रुप लिडरको चुनावमा छात्रातर्फ कोइरालाले ४३ र छात्रतर्फ निरौलाले ४० मत प्राप्त गरी निर्वाचित भएका हुन् ।
विद्यालय परिसरमै लोकतान्त्रिक विधि अनुसार आयोजित चुनावमा ९ जनाको मात्र उम्मेदवारी परेको निर्वाचन अधिकृत एसपी लुइटेलले जानकारी दिए ।
उनका अनुसार छात्रातर्फ ५ जना र छात्रतर्फ ४ जनाको उम्मेदवारी परेको थियो । चुनावमा जम्मा ९१ मतदाता मध्ये ८८ जनाले मात्र मतदान गरेको उनले बताए ।
उनका अनुसार एक मत बदर भएको थियो । चुनावी प्रक्रिया लोकतान्त्रिक अभ्यास अनुरुप नमुना कै रुपमा रहेको थियो । नवनिर्वाचित ट्रुप लिडरहरूलाई स्काउट दलका प्रमुख एवम् विद्यालयका प्रधानाध्यापक शिव मैनालीले बधाईसहित धन्यवाद दिएका थिए ।
स्काउट दलका मास्टर प्रभाष सुवेदीको उपस्थितिमा विजयी दुबै जना ट्रुप लिडरलाई प्रमाणपत्रसहित सम्मान गरिउको थियो ।
प्रधानाध्यापक मैनालीले विद्यार्थीको नेतृत्व विकास, लोकतान्त्रिक चेतनाको अभिवृद्धिका लागि यस किसिमका गतिविधि नियमितरूपमा आयोजना हुँदै आइरहेको बताए । विद्यालयले भर्खरै क्याप्टेनहरु पनि चुनावी प्रक्रियाबाटै छनोट गरेको उनको भनाई छ ।
सूर्योदय स्काउट दलको आयोजनामा ट्रुप लिडरको निर्वाचन सम्पन्न भएको थियो । चुनावमा निर्वाचित दुवै जना कक्षा ९ का विद्यार्थीहरु हुन् । स्काउट दलमा कक्षा–५ देखि १० कक्षा सम्मका विद्यार्थीहरु रहेका छन् ।
Discussion about this post