दुवै आगलागी घटनामा नगरप्रमुखद्वारा दुःख व्यक्त

मेचीनगर, ६ जेठ । मेचीनगरमा आइतबार र मंगलबार दुई वटा घरमा आगलागी भयो । आगलागीको कारण विद्युत सर्ट भएको थियो ।

आइतबार मेचीनगर–३ स्थित भावाना चोकको वस्तीभित्र चित्रा, टिन र काठको टाढे घर र आज विहान मेचीनगर–९ स्थित थोप्लेविरानको दुई तले इटाको गारो, टिन र काठको घरमा आगलागी भयो ।

भावाना चोकको लालबहादुर सुब्बाको टाढे घरमा दिउँसो ४ वजे विद्युत सर्ट भइ आगलागी हुँदा उनी र उनका परिवारले लगाएको कपडादेखि बाहेक केहि बचाउँन सकेनन् ।

सुब्बाको दुई विघा ऐलानी जग्गाभित्र रहेको सानो चित्रा, टिन र काठको टाढे घरमा रहेको ८० मन धान, २ वटा साइकल, एकतोला सुन, ५५ हजार नगद, भाडावर्तन, लुगाफाटा सबै जलेर नष्ट भएको थियो ।

‘दिउँसो घरमा आराम गरिरहेका बेला विद्युतमा एक्कासी चट्याक्क गरेको आवाज आयो’, सुब्बाले भने–‘भरे हुस्सहुस्सी आगो बल्न थाल्यो । ५ जनाको परिवार थियो । सबै भाग्नतिर लाग्यो । घरभित्र भएका सबै सामान खरानी भए ।’

मेचीनगर–३ का वडाध्यक्ष हर्कबहादुर वस्नेतले घर आगलागी हुँदा करिव ३० लाखको क्षति भएको जानकारी दिए । उनले आगलागी भएको थाहा हुने वित्तिकै दमकल आयो तर, सबैतिर बाटो निर्माण भइरहेकाले गाउँको सानो बाटोमा घुमाएर दमकल लादा नियन्त्रण प्रयासमा समय लागेको बताए ।

यस्तै आज विहान ८ वजे मेचीनगर–९, थोप्ले विरान स्थित मणिराज अधिकारीको घरमा आगलागीको घटनामा पनि सोही प्रकृतिको कारण दमकल समयमा पुग्न ढिलो भएको थियो ।

साढे ९ वजे आगो नियन्त्रणमा आएपनि कपडा, भाडा बर्तन, फर्निचर, अन्नपात र घर पूर्णरुपमा नष्ट भएको थियो । उक्त घटनामा करिव ११ लाख मुल्य बराबरको क्षति भएको जिल्ला प्रहरी कार्यालय झापाले जानकारी दिएको छ ।

आगलागी घटनामा मेचीनगर नगरपालिकाका प्रमुख गोपालचन्द्र बुढाथोकीसँगै उपप्रमुख मीना पोखरेल उप्रेती, वडाध्यक्ष वस्नेत लगायतको उपस्थिति रहेको थियो ।

दुईवटै घरको आगलागी घटनामा स्थानीय, सुरक्षाकर्मी र दमकलले आगो निभाउने प्रयास गरेका थिए । नगरप्रमुख बुढाथोकीले आगलागीका घटनाहरु बढिरहेकाले सचेत रहन नगरवासीलाई अनुरोध गरेका छन् ।

नगर क्षेत्रका प्रायः सबै बाटाहरु निमार्णाधीन अवस्थामा रहेकाले दमकल जाने बाटो अवरोध भएकाले आगलागी भएको ठाउँमा पुग्न समस्या भएको उनले बताए ।

बन्दै गरेका सडक र गाउँका साँघुरो बाटोको कारण दमकल समयमा नपुगेको कारण क्षति भएको उनको भनाई छ ।
नगरप्रमुख बुढाथोकीले दुवै आलगागी घटना भएको परिवारमा दुःख व्यक्त गर्दै क्षतिपूर्तीका लागि छलफल गरिने बताए ।