मेचीनगरमा ‘एकीकृत सेवा प्रवाह’ सुरु गर्ने तयारी

काँकरभिट्टा, १३ जेठ । आम नागरिकलाई बिना झन्झट सहज र कम समयमै गुणस्तरीय सेवा दिने लक्ष्यसहित मेचीनगर नगरपालिकाले एकीकृत सेवा प्रवाह सुरु गर्ने भएको छ ।

सार्वजनिक सेवा प्रवाहलाई छिटो, गुणस्तरीय, पहुँचयोग्य, जनसहभागितामूलक तथा निष्पक्ष नहुँदा झन्झट व्यहोर्नुपर्ने बाध्यता रहेको आमनागरिकको गुनासो रहँदै आएको छ । तर, अब मेचीनगरमा सार्वजनिक सेवा प्रवाहमा सुधार गर्ने भएको छ ।

यो सेवा लागू भएपछि दैनिक कार्यसम्पादनको तथ्यांक व्यवस्थापन, लाइन लाग्नुपर्ने अवस्था, फायल हराउने, कागजपत्र मिलाउनुपर्ने झन्झटबाट पनि नागरिकले मुक्ति पाउने छन् ।

सोही विषयमा मंगलबार नगरपालिकाले काँकरभिट्टा खानेपानीको सभा हलमा सूचना प्रविधिमा आधारित ‘एकीकृत नगर सेवा प्रणाली’ सञ्चालन सम्बन्धी अभिमुखीकरण कार्यक्रम राखेको थियो । उक्त कार्यक्रममा जनप्रतिनिधि, शाखा प्रमुख, वडा सचिव, कम्युटरका प्राविधिकहरुको सहभागिता रहेको थियो ।

कार्यक्रमका प्रमुख अतिथि नगरप्रमुख गोपालचन्द्र बुढाथोकीले नगरवासीलाई धेरै भन्दा धेरै सुविधा दिएर सहज बनाउनका लागि नगरपालिकाले प्रविधि मार्फत सेवा दिन लागिरहेको बताए ।

उनका अनुसार यसका लागि दुई वर्षदेखि निरन्तर लागिरहेका थियौँ । अब उक्त सेवा करिव असार पहिलो हप्तादेखि सञ्चालन गर्ने लक्ष्य रहेको छ । यस्तो सेवाले नागरिकलाई शुसासनको कुरामा जोड दिने उनको भनाई छ ।

प्राविधिक र प्रणालीको रिसोर्सका रुपमा नगर विकास कोषको रहेको छ । अब नागरिकका गुनासा व्यवस्थापन, अनलाइन सिफारिस, नागरिक प्रोफाइल निर्माण, नागरिक वडा पत्र लगायतका सेवा प्रवाह हुने छन् ।

कार्यक्रमकी विशिष्ठ अतिथि उपप्रमुख मीना पोखरेल उप्रेतीले नागरिकलाई वडा, नगर धाउँने समस्याबाट मुक्त गर्न घरैबाट सेवा दिने उदेश्यले यो प्रविधिमैत्री नगर बनाउन खोजिरहेको बताइन् ।

आफुले सेवा लिन चाहेको कुरालाई ट्याक गर्न सकिने, जस्तो आफुले भरेको अनलाइन फर्मको अवस्था कस्तो छ, कागज बन्यो बनेन, फायल कहाँ पुग्यो लगायतका कुराहरुलाई उक्त सेवाबाट सहजै हेर्न मिल्ने भएको छ ।

कार्यक्रममा नगर विकास कोष अन्तरगतको योजना, अनुगमन तथा मुल्याङ्कन महाशाखाकी प्रमुख सिर्जना खड्का, कन्सल्टेन्ट इश्वर पोखरेल लगायतले एकीकृत नगर सेवा प्रणालीका बारेमा चर्चा गरेका थिए ।

नगरपालिकाका प्रमुख प्रशासकीय अधिकृत अग्निप्रसाद अधिकारीको अध्यक्षतामा सम्पन्न कार्यक्रमको स्वागत वरिष्ठ प्रशासकीय अधिकृत अनन्तप्रकाश वस्तीले र सञ्चालन सूचना प्रविधि अधिकृत असोक भेटवालले गरेका थिए ।