दृष्टिकोण वैज्ञानिक ढंगले सोचे समृद्धि सम्भव : पूर्व राष्ट्रपति भण्डारी

झापा, २४ जेठ । पूर्वराष्ट्रपति विद्यादेवी भण्डारीले वैज्ञानिक दृष्टिकोणबाट सोच्न सक्ने बनाए मात्रै मुलुकको समृद्धि सम्भव हुने बताएकी छन् ।

नेकपा एमाले कोशी प्रदेशको विज्ञान तथा प्रविधि विभागले बिर्तामोड स्थित देवि माविमा शनिबारदेखि सोमबारसम्म सञ्चालन गरेको प्रदेश स्तरीय विज्ञान तथा प्रविधि प्रदर्शनी कार्यक्रमको उद्घाटन गर्दै उनले यस्तो बताएकी हुन् ।

उनका अनुसार बालबालिकाहरुलाई वैज्ञानिक दृष्टिकोणबाट सोच्न सक्ने बनाए मात्रै मुलुकको समृद्धि सम्भव हुने दावी गरिन् । पूर्व राष्ट्रपति भण्डारीले परिवर्तनको आधार नै विज्ञान प्रविधि भएकाले सामाजिक, राजनीतिक, नीजि क्षेत्र र राज्य पक्षले यसमा लगानीको बातावरण बनाउनु पर्नेमा जोड दिइन् ।

विद्यार्थीहरुलाई विज्ञान तथा प्रविधिमा दक्ष बनाएर विश्वस्तरीय प्रतिस्पर्धी बनाउन सके प्रदर्शनी फलदायी हुने उनको भनाई छ ।

‘विज्ञानलाई प्रयोगशालामा मात्र सिमित गर्न हुँदैन’, भण्डारीले भनिन्–‘यसलाई विकाससँग जोडेर लैजानु पर्छ । अनि मात्रै विद्यार्थीहरु विज्ञान तथा प्रविधिमा दक्ष हुन्छन् ।’

कार्यक्रममा नेकपा एमाले कोशी प्रदेशका इञ्चार्ज एवम् कोशीका संस्थापक मुख्यमन्त्री शेरधन राई, कोशी प्रदेशका सचिव राजकुमार भण्डारी, देवी माविकी प्रधानाध्यापक अम्बिका श्रेष्ठ लगायतले शुभकामना मन्तव्य राखेका थिए ।

प्रदर्शनीमा प्रथम हुने विद्यालयले चार लाख, दोस्रो हुनेले तीन लाख, तेस्रो हुनेले दुई लाख र सान्त्वना हुनेले एक लाख नगद पुरस्कार प्राप्त गर्ने छन् ।

प्रदर्शनीमा कोशीका १२ जिल्लाका ७२ वटा विद्यालय सहभागी भएका छन् । स्टलमा विद्यालयहरुले विज्ञान तथा प्रविधिका विषयमा जानकारी दिने सामग्रीहरु प्रदर्शनीमा राखेका छन् ।

एमाले कोशी प्रदेशको विज्ञान तथा प्रविधि विभागका प्रमुख गणेश पोखरलको अध्यक्षता रहेको उद्घाटन कार्यक्रमको सञ्चालन पार्टीका झापा उपाध्यक्ष शिव ढुंगेलले गरेका थिए ।