मेचीनगर, १२ असार । मेचीनगरको ठुला गौरवका योजनाहरु मध्येको महिला सीप विकास केन्द्रको नयाँ भवन आज एक कार्यक्रमबीच उद्घाटन गरिएको छ ।
मेचीनगर–८ स्थित महिला सीप विकास केन्द्रको भवन विहीबार मेचीनगर नगरपालिकाका प्रमुख गोपालचन्द्र बुढाथोकीले उद्घाटन गरेका हुन् ।
प्रमुख अतिथि नगरप्रमुख बुढाथोकीले सीप सिकेर व्यवसायिक बन्न महिलाहरुलाई आग्रह गरेका छन् । उनले महिलाहरुले उत्पादन गरेका सामग्री बजारीकरणका लागि नगरपालिकाले सहकार्य गर्ने बताए ।
‘अहिलेसम्म तालिम दिनेले तालिम मात्र दिए’, बुढाथोकीले भने–‘सिक्नेले सिकेमात्र । व्यवसायिक कम मात्र बने । त्यसैले उद्यमी बन्न चाहाने महिलाहरुका लागि यो तालिम केन्द्र उपलब्धीमुलक हुनेछ ।’
नगरपालिकाको गौरवको योजना अन्तरगत २०७४ सालदेखि भवन निर्माणका लागि सुरु भएको तालिम केन्द्र यसपटक सम्पन्न भएको हो । पहिलो कार्याकाल पूरा गरेकी उपप्रमुख मीना पोखरेल उप्रेती र नगरप्रमुख विमल आचार्यको पालामा उक्त भवन बनाउन सुरु गरिएको थियो ।
दोस्रो कार्यकालकी उपप्रमुख समेत रहेकी उप्रेतीले मेचीनगरका महिलाहरुको सीप, क्षमता, आत्मनिर्भरता बनाउने उदेश्यले उक्त भवन निर्माण गरिएको जानकारी दिइन् ।
भावुक हुँदै उप्रेतीले भनिन्–‘बुबा–आमा खस्दा जसरी रोएको थिए । आज यो भवन बनिदा जति खुशी कहिलै भइन् । आज धेरै हास्ने दिन हो । विगतदेखिको एउटा सपना साकार भएको छ ।’ महिलाहरुलाई विभिन्न तालिमहरु दिएर उद्यमशीलता बनाउन यो तालिम केन्द्र कोशेढुंगा सावित हुने उनको भनाई छ ।
कार्यक्रममा मेचीनगर–८ का वडाध्यक्ष गिरीराज धमला लगायतले शुभकामना मन्तव्य व्यक्त गरेका थिए ।
मेचीनगरका विपन्न, सीमान्तकृत, लोपोन्मूख, उत्पीडित र ग्रामीण क्षेत्रका महिलाहरुलाई सीप सिकाएर उद्यमशीलता बनाउने लक्ष्यका साथ तीन करोड ५० लाखको लागतमा महिला सीप विकास केन्द्रको निर्माण गरिएको हो । स्थानीय सरकारको तर्फबाट सुरुवात गरिएता पनि कोशी प्रदेश र संघीय सरकारको सहयोग रहेको छ ।
सोही अवसरमा नगरप्रमुख बुढाथोकी र उपप्रमुख उप्रेतीले ढाका बुनाई तालिम तथा प्रविधि हस्तान्तरण कार्यक्रमको समेत उद्घाटन गरेका छन् । उक्त भवनमा आजैदेखि तीन महिने ढाका बुनाई तालिम पनि सुरु भएको छ ।
नगरपालिकाका प्रशासन, योजना तथा अनुगमन शाखा प्रमुख अनन्तप्रकाश वस्तीले स्वागतसहित नगरका गौरवका योजनाहरुमध्ये उक्त तालिम केन्द्रको भवन सम्पन्न भएको, केहिको काम भइरहेको र केहि स्थगित रहेको जानकारी दिएका थिए ।
कार्यक्रमको अध्यक्षता उपप्रमुख मीना पोखरेल उप्रेतीले र सञ्चालन नगरपालिकाकी महिला, बालबालिका तथा समाज कल्याण शाखा प्रमुख जयन्ती खरेलले गरेकी थिइन् ।
Discussion about this post