मेचीनगर, २६ असार । अपाङ्गता भएका अनाथ, टुहुरा बालबालिकाहरुको पालनपोषणमा जुटेको मेचीनगरको एउटा सामाजिक संस्थाले खर्च धान्न समस्या भएको बताएको छ ।
मेचीनगर–७ मा रहेको सामाजिक संस्था समाज सेवा सुधार युवा संघ अपाङ्ग सहयोग समितिको पाँच कठ्ठा जग्गामा तीन तले भवनमा हाल १६ जना अपाङ्गता भएका अनाथ तथा टुहुरा बालबालिकाहरु बस्ने गर्छन् ।
उनीहरुलाई उक्त संस्थाले पालनपोषण र पढ्नदेखि सबै कुराको व्यवस्था गरिदिएको छ । वि.सं.२०६० सालमा स्थापना भएको संस्थामा मेचीनगरसहित विभिन्न जिल्लाका २० जना मध्ये हाल १६ जनामा १० जना बालक र ६ जना बालिका रहेको समाज सेवा सुधार युवा संघ अपाङ्ग सहयोग समितिका उपाध्यक्ष गंगाप्रसाद संग्रौलाले जानकारी दिए ।
उनीहरु उदयपुरको त्रियुगा नगरपालिका, ताप्लेजुङ, सुनसरीको इटहरी, भद्रपुर र मेचीनगर नगरपालिकाका अपाङ्गता भएका अनाथ र टुहुरा बालबालिकाहरु हुन् ।
संस्थामा बुबा–आमा नभएका, अपाङ्गता भएर ल्याएका, कोहि विचल्लीमा परेका लगायतका बालबालिकाहरु छन् । प्रायः कोहि पनि प्रष्ट बोल्न सक्ने अवस्थाका छैनन् ।
उनीहरुमध्ये ७ जना स्थानीय सरसवती आधारभूत विद्यालयमा पढ्ने गरेको संग्रौलाले बताए । उनका अनुसार अन्य बाँकी रहेकालाई संस्थामा नै शिक्षकका रुपमा राजेश गुरागाईले पढाउने गरेका छन् ।
संस्थामा दुई जना कर्मचारीमा शिक्षक गुरागाई र अर्का कर्मचारी अम्बिका पोखरेल बालबालिकाको सेवामा खटिएका छन् ।
बालबालिकाको पालनपोषण, कर्मचारी र संस्थाको व्यवस्थापनका लागि मेचीनगर नगरपालिकाले बर्षेनि ५ लाख रुपैयाँ बजेट दिने गरेको समाज सेवा सुधार युवा संघ अपाङ्ग सहयोग समितिका अध्यक्ष धर्मराज घिमिरेले बताए ।
‘नगरपालिका र विभिन्न दाताहरुको सामान्य सहयोगले दुःख, सुख चलिरहेको छ’, अध्यक्ष घिमिरेले भने–‘संस्था चलाउन समस्या भएको छ । करिव ८ देखि १० लाख रुपैयाँ भए संस्था चलाउन सकिने थियो । बर्षमा मेरै करिव २÷३ लाख रुपैयाँ गोजीको खर्च हुन्छ ।’
संस्थालाई मेचीनगर नगरपालिका बाहेक अन्य कुनै पनि सरकार र दातृ निकायले सहयोग नगरेको बताइएको छ । कसैलाई इच्छा लागे संघ–संस्था तथा व्यक्तिको जन्मदिन वा अन्य कुनै कार्यक्रम हुँदा सहयोगी मन भएकाहरु संस्थामा आएर खाद्यन्न, लत्ताकपडा र नगद सहयोग गर्ने गरेको उपाध्यक्ष संग्रौलाको भनाई छ ।
Discussion about this post